Улаанбаатар цахилгаан түгээх газраас хэрэглэгч айл өрхүүдэд суурилуулсан шинэ төрлийн ухаалаг (смарт) тоолуур нь төлбөр тооцоог хугацаанд нь хийгээгүй тохиолдолд цахилгааны хэрэглээг автоматаар таслах системтэй болжээ.
Энэхүү ухаалаг тоолуур нь сар бүрийн 10-наас дараа сарын 10-ны өдөр хүртэлх хугацааны цахилгааны хэрэглээндээ бичилт хийдэг. Харин уг хэрэглээний төлбөрийг айл өрх тухайн сарын 20-ны дотор багтаан төлөх хугацаатай байдаг юм.
Хэрэглэгчид цахилгааны төлбөрөө сар бүрийн 20-ны дотор төлөөгүй тохиолдолд смарт тоолуур тухайн айлын тогны хэрэглээг шууд тасалж байгаа тул анхаарах шаардлагатай. Төлбөрөө төлсний дараа айл өрх цахилгаанаа буцаан залгуулахын тулд 70047004 дугаарын утас руу заавал холбогдож, цахилгааны кодоо хэлэх ёстойг Цахилгаан түгээх газраас онцолж байна. Энэ дугаараар холбогдсоноор төлбөр төлөгдсөн тухай мэдэгдэл тухайн дүүргийн цахилгаан түгээх газарт хүрч, хэрэглээг дахин сэргээдэг байна.
