АНУ-ын Ерөнхийлөгч Дональд Трамп болон ОХУ-ын Ерөнхийлөгч Владимир Путин нарын утасны яриа 2.5 цаг үргэлжилсэн байна. Цагаан ордны мэдээлснээр тэд Украины дайн дахь гал зогсоох асуудал болон АНУ-ОХУ-ын харилцааг сайжруулах талаар ярилцжээ. Кремлийн мэдээлэлд мөн олзлогдсон хүмүүсийг харилцан солилцох талаар хэлэлцсэн гэж дурджээ.
АНУ-ын байр суурь
Трамп, Путин нар гуравдугаар сарын 18-нд утсаар холбогдож, Украины дайныг зогсоох асуудлыг хөнджээ. Цагаан ордны мэдээлснээр, талууд гал зогсоож, тогтвортой энх тайван тогтоох шаардлагатай гэж үзсэн байна.
“Лидерууд гал зогсоох үйл явцыг эрчим хүчний болон дэд бүтцийн объектуудад эхлүүлж, улмаар Хар тэнгист энхийн хэлэлцээр байгуулах, бүрэн хэмжээний гал зогсоох шийдэлд хүрэх талаар санал нэгдсэн” гэж Цагаан ордон мэдэгджээ.
Мөн Ойрхи Дорнод дахь тогтвортой байдал, стратегийн зэвсгийн хяналтын талаар санал солилцсон байна. АНУ-ОХУ-ын харилцаа сайжирвал эдийн засгийн хамтын ажиллагаа өргөжин, дэлхийн геополитикийн тэнцвэрт байдал тогтворжих боломжтой гэж үзэж байна.
Трамп энэхүү яриаг “маш сайн, үр дүнтэй” гэж тодорхойлсон.
“Бид эрчим хүчний болон дэд бүтцийн объектуудад гал зогсоох талаар тохиролцсон. Одоо бид бүрэн хэмжээний гал зогсоох, улмаар энхийн гэрээ байгуулахын төлөө ажиллана.”
Түүнчлэн, ОХУ болон Украины талаас олон мянган цэрэг амиа алдсан гэдгийг онцолж, “энэ байдлыг зогсоох нь маш чухал” гэжээ.
ОХУ-ын байр суурь
ТАСС агентлагийн мэдээлснээр, Путин утсаар ярих үеэрээ олзлогдсон хүмүүсийг солилцох талаар мэдээлэл өгсөн байна. Тэрбээр “гуравдугаар сарын 19-нд 175:175 форматаар хоригдлуудыг харилцан солилцоно” гэж мэдэгджээ. Цэргийн ажиллагааг зогсоох талаар, Путин Трампын санаачилгыг дэмжиж, 30 хоногийн турш эрчим хүчний объектуудад цохилт өгөхгүй байх тушаал өгсөн гэж Кремлийн мэдэгдэлд дурдсан байна.
Кремль мөн Украины мобилизацийг зогсоох, тэдний цэргийн хангамжийг тасалдуулах шаардлагатай гэж үзсэн. Путин:
“Украины цэрэгт гадаадын зэвсгийн тусламжийг бүрэн зогсоох нь мөргөлдөөнийг хурцатгахгүй байх гол нөхцөл юм.”
Мөн Орос, АНУ-ын харилцааг хэвийн болгох нь дэлхийн тогтвортой байдалд чухал гэдгийг Путин онцолжээ.ТАСС агентлагийн мэдээллээр, Трамп, Путин нар АНУ-ОХУ-ын хоккейн багуудын нөхөрсөг тоглолт зохион байгуулах тухай ч ярилцсан байна.
Украины хариу үйлдэл
Украины Ерөнхийлөгч Володимир Зеленский Кремлийн мэдэгдэлд хариу өгч, Путины гол зорилго нь Украины армийг сулруулах гэж мэдэгджээ.
“Путин мобилизаци болон зэвсгийн тусламжийн талаар ярьж байна. Үүнээс харахад түүний гол зорилго нь бидний арми, батлан хамгаалах чадавхыг сулруулахад чиглэж байна.”
Зеленский мөн олзлогдсон хүмүүсийг солилцох тухай мэдээллийг баталж, энэ нь Украины төлөвлөгөөний нэг хэсэг байсныг онцолсон.
“175 хүнийг 175 хүнээр солилцох талаар ярьсан. Бид аль хэдийн энэ ажиллагааг төлөвлөсөн байсан. Харин бодит байдал дээр хоригдлуудыг бүхэлд нь суллах нь л гал зогсоох жинхэнэ баталгаа болно.”
Украины ерөнхийлөгч мөн орон даяар 40 гаруй дроны цохилт болсон талаар мэдээлж, Сумын эмнэлэгт онож, хохирол учруулсан гэжээ.
“ОХУ энхийн яриа хэлэлцээ хийх сонирхолтой байсан бол ийм цохилтуудыг зогсоох ёстой.”
Олон улсын хариу үйлдэл
Германы канцлер Олаф Шольц Украины эрчим хүчний дэд бүтцийг хамгаалахад чиглэсэн түр хугацааны гал зогсоох саналыг дэмжсэн боловч “Дараагийн алхам нь бүхэлд нь гал зогсоох байх ёстой” гэжээ.
Францын Ерөнхийлөгч Эммануэль Макрон мөргөлдөөнийг илүү том хэмжээний энхийн гэрээгээр шийдвэрлэх ёстой гэж үзэж байгаа бөгөөд “ил тод, баталгаатай энхийн хэлэлцээр” хийхийг уриалсан байна.
Өмнө нь юу болсон бэ?
Трамп Путинтэй утсаар ярихаасаа өмнө “тодорхой бүс нутгууд болон эрчим хүчний станцуудын талаар хэлэлцэнэ” гэж мэдэгдсэн.
АНУ болон Украин өмнө нь Саудын Арабад хийсэн хэлэлцээний үеэр 30 хоногийн гал зогсоох саналыг хүлээн зөвшөөрсөн гэж мэдэгдэж байсан. Харин Москва энэ саналыг тодорхой бус хэмээн үзэж, АНУ-аас Украины цэргийн тусламжийг зогсоох шаардлага тавьсан байна.
