ОХУ болон АНУ-ын Ерөнхийлөгчид болох Владимир Путин, Дональд Трамп нар Европын хэмжээнд хамгийн нөлөө бүхий 28 эрхмийг тодруулдаг Politico сэтгүүлийн Европын хувилбарын жилийн чансааны шилдэг тавд багтжээ. Трамп жагсаалтын нэгдүгээр байрыг эзэлсэн бол, Путин тавдугаар байранд бичигдсэн тухай Mongolnews24.com мэдээллээ.
Тус хэвлэлд тэмдэглэснээр, уламжлал ёсоор уг чансааг Европын улс төрчдөөр хязгаарладаг байсан ч, Путин, Трамп нарын Европын Холбооны улс төрийн чиг хандлагад үзүүлэх урьд өмнө байгаагүй нөлөө тэднийг жагсаалтад багтаахад хүргэжээ. Оросын Ерөнхийлөгчийн нөлөө Украин дахь үргэлжилсэн мөргөлдөөн болон эрчим хүчний бодлогын хүрээнд илүү тод харагдаж байгаа бол, Трампын дахин сонгогдсон явдал трансатлантын харилцааг өөрчилж эхэлсэн байна.
- Жагсаалтын хоёрдугаар байрыг 2025 оны хоёрдугаар хагаст Европын Холбооны Зөвлөлийг тэргүүлж буй Данийн Ерөнхий сайд Метте Фредериксен эзэлжээ.
- Гуравдугаар байранд Германы Канцлер Фридрих Мерц улсыг дахин зэвсэглэхээр шийдэмгий курс барьсныхаа төлөө бичигдсэн байна.
Шилдэг эрхмүүдийн жагсаалтад мөн Европын Комиссын Ерөнхийлөгч Урсула фон дер Ляйен (долоодугаар байр), НАТО-гийн Ерөнхий нарийн бичгийн дарга Марк Рютте (наймдугаар байр), Унгарын Ерөнхий сайд Виктор Орбан (12-р байр), Украины Ерөнхийлөгч Володимир Зеленский (14-р байр) болон Европын дипломатын тэргүүн Кая Каллас (16-р байр) нар багтжээ.
Politico Зеленскийд онцгой анхаарал хандуулж, түүнийг “хөзрийн багц дахь Жокер” хэмээн тодорхойлсон байна. Тус хэвлэл Украины удирдагч болон АНУ-ын Ерөнхийлөгчийн хооронд хоёр талын харилцаанд “сүйрлийн” нөлөөтэй гэж үзэгдэж байсан хоёрдугаар сарын зөрчлийг сануулжээ. Politico “Харилцааг сэргээж чадна гэдэгт цөөн хүн итгэж байсан ч, Украины удирдагчийн гавьяагаар энэ нь болсон” хэмээн онцолжээ.
Жагсаалтад мөн Их Британийн улс төрч Найжел Фараж, Италийн Ерөнхий сайд Жоржиа Мелони, Их Британийн Ерөнхий сайд Кийр Стармер, Францын Ерөнхийлөгч Эммануэль Макрон зэрэг нөлөө бүхий хүмүүс, түүнчлэн тус тивийн ирээдүйг тодорхойлогч санхүү, цэргийн зүтгэлтнүүд багтсан байна.
