2025 оны 8-р сард Бүгд Найрамдах Мальта Улсад зохион байгуулагдсан “Counter Strike 2” тоглоомын дээд зэрэглэлийн “BLAST Bounty Fall 2025” тэмцээнд Монголын “The MongolZ” баг финалд шалгарч, ОХУ-ын “Spirit” багийн эсрэг тоглон хоёрдугаар байр эзэлсэн.
Тус баг тэмцээнээс 68,000 ам.долларын шагнал хүртсэн бөгөөд энэ нь Монголын төгрөгт шилжүүлбэл 245,548,000 төгрөг болж байна. Гэсэн хэдий ч уг шагналаас Монгол Улс татвар хураах бөгөөд Хувь хүний орлогын албан татварын тухай хуулийн 19.1.1-д зааснаар урлаг, спортын тэмцээний шагнал болон бусад ижил төрлийн орлогод 5%-ийн татвар ногдуулна.
Монгол Улс Бүгд Найрамдах Мальта Улстай давхар татварын гэрээ байгуулаагүй тул шагналын орлогын 5%-ийг татвар болгон хураах зохицуулалт үйлчилнэ. Тооцооллоор энэ нь 12,277,400 төгрөг болж байна.
Тэмцээний ач холбогдол
“The MongolZ” багийн энэхүү амжилт нь Монголын цахим спортын хөгжилд чухал хувь нэмэр оруулж, дэлхийн тавцанд улсынхаа нэрийг сурталчилсан үйл явдал боллоо. Хэдий ялалт байгуулаагүй ч баг тогтвортой өндөр амжилт үзүүлж байна.
