Tesla компанийн бүтээж буй хүний хэлбэрт робот Optimus-ийн гол дутагдал нь тэдний удаан хөдөлгөөн гэж үзэж байна. Энэ талаар тус төслийн анхны удирдагч Крис Уолти тайлбар хийжээ.
Роботын хурд – үйлдвэрлэлд саад болж болзошгүй
“Үйлдвэрийн орчинд хамгийн чухал хүчин зүйл бол хурд. Давтагддаг ажлуудын гүйцэтгэл хурдан байх шаардлагатай. Роботууд энэ тал дээр сул байна” гэж Уолти мэдэгдэв.
Тэрбээр Tesla компанид долоон жил ажиллаж, 2022 он хүртэл Optimus төслийг удирдаж байжээ. Уолтигийн хэлснээр, хүн төрөлхтөн ч өөрсдөө үйлдвэрийн ажлын байртай нийцдэггүй бөгөөд “эволюцийн үндсэн зорилго нь чоно, баавгайнаас хамгаалах явдал байсан” гэв.
Хариу мэдэгдэл хийсэн Илон Маск
CNBC-д өгсөн ярилцлагын дараахан Tesla-ийн тэргүүн Илон Маск хариу өгч, 2025 оны эцэс гэхэд түүний үйлдвэрийн шугам дээр олон мянган Optimus робот ажиллаж байх болно хэмээн мэдэгджээ.
Өмнө нь тэрбээр эдгээр роботуудыг хүний хамгийн гол туслагч болгож, үйлдвэрийн орчин дахь давтагддаг, хүнд, аюултай ажлуудыг тэдэнд даатгана гэж амласан.
