Энэ сарын 2-ны өдөр “Дулааны цахилгаан станц-3” ТӨХК-ийн тоног төхөөрөмжийн хэсэгт гал гарч, нэг инженер харамсалтайгаар амиа алдан, өөр нэг ажилтан угаартаж эмнэлэгт хүргэгдсэн ноцтой осол гарсан. Ослын шалтгааныг тогтоох болон хохирлыг үнэлэх ажлын хүрээнд холбогдох байгууллагууд газар дээр нь ажиллаж байна.
Эрчим хүчний хоёр чиглэлд хүндрэлийн эх үүсвэр бий болов
Ослын улмаас Улаанбаатар хотын эрчим хүчний системд дулааны болон цахилгаан хангамжийн дараах хүндрэлүүд үүсээд байна:
- Дулаан хангамжийн дутагдал – 100 г/кал
- Цахилгаан эрчим хүчний дутагдал – 50 МВт
Дулааны асуудлыг дотоодоос шийднэ
Тодруулбал, дулааны хомсдлыг бууруулахын тулд ТЭЦ-4 болон Амгалангийн дулааны цахилгаан станцуудад ачаалал шилжүүлсэн байна. Харин ТЭЦ-3-ын эвдрээгүй байгаа зуухнуудад зөвхөн дулаан үйлдвэрлэх чиг үүргийг үлдээн ашиглаж эхэлжээ.
Цахилгааны дутагдлыг импорт, шинэ эх үүсвэрээр нөхнө
Харин цахилгаан эрчим хүчний 50 МВт-ын дутагдлыг дараах хоёр хувилбараар нөхөхөөр төлөвлөж байна:
- Бөөрөлжүүтийн цахилгаан станцын хоёрдугаар блок – 150 МВт хүртэл хүчин чадалтай уг блокийг эрчимжүүлж ашиглалтад оруулах.
- Өвөр Монголын ӨЗО-оос цахилгаан импортлох – 80 МВт-ын цахилгаан эрчим хүчийг түр хугацаагаар импортоор хангах.
Хотын эрсдэлтэй нөхцөл байдал
Хүйтний улирал дөхөж буй энэ үед дулаан болон цахилгааны тасалдал нь нийслэлийн иргэдийн амьдралд ноцтой сөрөг нөлөө үзүүлж болзошгүйг мэргэжилтнүүд анхааруулж байна. Иймээс Засгийн газар нөхцөл байдалд нэн даруй хариу үзүүлж, нэмэлт эх үүсвэрүүдийг богино хугацаанд ашиглалтад оруулахаар ажиллаж байна.
