2024 оны нэгдүгээр сард Нийслэлийн төвд байрлалтай “Урт цагаан” худалдаа, үйлчилгээний төвийг буулгаж, оронд нь цэцэрлэгт хүрээлэн байгуулах ажлыг есдүгээр сард эхлүүлсэн. Анх төлөвлөснөөр энэ сарын 7-нд нээлт хийх ёстой байсан ч одоогоор тохижилтын ажил бүрэн дуусаагүй, 80 гаруй хувийн гүйцэтгэлтэй үргэлжилж байна.
Иргэдийн дунд “Урт цагаан” хэмээн танигдсан энэхүү газарт одоо дугуйн зам, зүлэгжүүлэлт зэрэг үндсэн тохижилтууд хийгдсэн. Харин усан оргилуур, задгай тайз, авто граж зэрэг ажлууд бүрэн дуусаагүй байгаа аж. Нээлтийн талаарх мэдээлэл цацагдсантай холбоотойгоор олон хүн энэ өдөр хүрэлцэн ирсэн ч цэцэрлэгт хүрээлэнг үзэх боломжгүй байжээ. Тэдний нэг Т.Ананд хүүгийнхээ хамт ирсэн ч сэтгэл гонсгор буцсан байна.
Цэцэрлэгт хүрээлэн бүрэн ашиглалтад орсноор 196 автомашины багтаамжтай дөрвөн блок бүхий зогсоолтой, нэг чигийн хөдөлгөөн бүхий ухаалаг системтэй граж ашиглалтад орно. Мөн нийт төслийн 26.5 хувийг ногоон байгууламж эзлэхээр төлөвлөсөн. Үүнээс гадна худалдаа үйлчилгээний талбай болон жуулчдад зориулсан мэдээллийн төв баригдаж байгаа талаар албаны эх сурвалжууд мэдээлжээ.
Бүтээн байгуулалтын зардлыг орон нутгийн төсвөөс санхүүжүүлсэн бөгөөд нийт 44 тэрбум төгрөгийн хөрөнгө оруулалттай. Нийслэлчүүдийн хувьд Үндэсний цэцэрлэгт хүрээлэн, Соёл амралтын хүрээлэнгээс өөр чөлөөт цагаа өнгөрөөх газар цөөн тул энэ шинэ төслийн талаар хүлээлт өндөр байна.
Цэцэрлэгт хүрээлэн нийт 1.3 га талбайг хамрах ба анх Нийслэлийн өмчийн гуравдугаар байр буюу 1958 онд ашиглалтад орсон хуучин үйлчилгээний төвийн суурин дээр хэрэгжиж буй. Уг төв нь нийт 8000 м.кв талбайд 30 гаруй иргэнтэй гэрээ байгуулан 200 гаруй түрээслэгчдэд дамжуулан ашиглуулдаг байсан ч олон жил засвар хийгдээгүй нь хотын өнгө үзэмжид сөргөөр нөлөөлж байсныг иргэд шүүмжилдэг байв.
Шинээр баригдаж буй үйлчилгээний төвийн хэмжээ 30х32 метр бөгөөд цэцэрлэгт хүрээлэнгийн 10 хувийг эзлэх юм. Харин авто зогсоолын нийт талбай 7484 м.кв байх төлөвтэй.
“Бодь пропертийз” ХХК-ийн инженер Энхтөр:
“Цэцэрлэгт хүрээлэнгийн ажил үргэлжилж байна. Уг нь аравдугаар сард хүлээлгэж өгөхөөр гэрээлсэн ч наймдугаар сарын 1-нд багтаан нээхээр бүх хүчээ дайчилж байна. Одоогоор 400 гаруй бут сөөг, дөрвөн улиралд тохиромжтой зүлэг, гулгалтаас сэргийлсэн зам тавьсан. Иргэд нээгдсэн гэж ойлгон хашлага давах нь ихэссэн. Тиймээс аюулгүй байдлыг хангаж, түр нэвтрэхийг хязгаарласан.”
Чингэлтэй дүүргийн оршин суугч С.Дулам өдөр бүр ажилдаа явах замдаа уг бүтээн байгуулалтыг анхааралтай ажигладаг гэнэ. Тэрбээр:
“Хуучин байшин маш эвгүй харагддаг байсан. Засвар хийлгүй олон жил болсноос болж хотын өнгө үзэмж муудсан. Би иргэн хүнийхээ хувьд энэ төслийг дэмжиж байгаа. Гэхдээ нээгдээгүй байхад хүмүүс ирж сэтгэл дундуур буцаж байгаа нь харамсалтай. 44 тэрбум төгрөг гэдэг бол их мөнгө. Энэ төсвөөр иргэдийн амралт, чөлөөт цагийг зөв зохион байгуулах цогц орчин бүтээх ёстой гэж бодож байна. Манай орчимд хүн ам ихтэй ч амрах газар бараг байхгүй. Мөн тохижилтын ажил үргэлжилж байгаа учир явган хүний зам хаагдаж, автомашины урсгалтай хэсгээр алхахаас өөр аргагүй байна. Хэрэв хурдан дуусвал олон гэр бүл амралтаа үр бүтээлтэй өнгөрүүлэх боломжтой болно.”
