“Forbes” сэтгүүл Америкийн нэрт найруулагч Стивен Спилбергийг дэлхийн хамгийн баян найруулагчаар нэрлэсэн талаар “Mongolnews24.com” мэдээллээ. Хэвлэлийн мэдээлснээр, түүний хөрөнгийн хэмжээ 7.1 тэрбум ам.долларт хүрсэн байна. Өдгөө 79 настай найруулагчийн хөрөнгө өнгөрсөн онтой харьцуулахад 1.8 тэрбум ам.доллароор өсжээ.
Стивен Спилбергийн найруулсан кинонууд дэлхийн зах зээлээс нийт 10 тэрбум гаруй ам.долларын ашиг олсон байдаг. Тэрээр кино уран бүтээлийн ашгаас гадна “Universal” студийн парк дахь тасалбар борлуулалт бүрээс тодорхой хувь эзэмшдэг нь хөрөнгө нь зузаарах нэг үндэс болдог аж.
Тэрээр “Эрүү” (Jaws), “Харь гаригийн хүн” (E.T.), “Шиндлерийн бүртгэл” (Schindler’s List), “Юрийн галавын цэцэрлэг” (Jurassic Park) болон “Индиана Жонс” (Indiana Jones) цуврал кинонуудаараа дэлхий дахинаа хүлээн зөвшөөрөгдсөн билээ. Найруулагчийн сүүлийн үеийн уран бүтээлүүдээс дурдвал “Вестсайдын түүх” (West Side Story) болон түүний кино урлаг дахь гарааг харуулсан хагас намтарчилсан “Фабельманы гэр бүл” (The Fabelmans) киног нэрлэж болно.
