Нийслэлчүүдийн уламжлалт баяр болох “Улаанбаатарын мөнгөн шөнө–2025” цэнгүүн өнөөдөр Сүхбаатарын талбайд 21:00–00:30 цагийн хооронд болох гэж байна. Энэхүү олон нийтийг хамарсан томоохон арга хэмжээний үеэр иргэдийн аюулгүй байдал, хэв журам болон зохион байгуулалтыг хангахаар нийт 30 гаруй байгууллагын 1,800 гаруй ажилтан, албан хаагчид нэгдсэн хүчээр ажиллахаар бэлтгэлээ бүрэн хангажээ.
Аюулгүй байдал ба хэв журмын хамгаалалт
Баярын арга хэмжээний үеэр иргэдийн амгалан тайван байдлыг хангах зорилгоор цагдаагийн байгууллагын 450 алба хаагч нийтийн хэв журам сахиулж, замын хөдөлгөөний зохицуулалтад 115 алба хаагч тус тус үүрэг гүйцэтгэнэ. Мөн он солигдох мөчид болох ёслолын буудлагын үеийн галын аюулгүй байдлыг Онцгой байдлын байгууллагын 92 алба хаагч тусгай зориулалтын автомашинуудтайгаар хариуцан ажиллах юм.
Төв талбайн ойр орчимд хүнсний аюулгүй байдлын хяналт шалгалтын улсын байцаагчид болон эмнэлгийн яаралтай тусламжийн багууд бэлэн байдалд ажиллана.
Хүүхэд хамгаалал ба иргэдэд зориулсан үйлчилгээ
Олон нийтийн бөөгнөрлийн үеэр бага насны хүүхэд төөрөх эрсдэлээс урьдчилан сэргийлж, шар хантаазтай хүүхэд хамгааллын хөдөлгөөнт багууд талбай дээр ажиллана. Хэрэв хүүхэд төөрсөн тохиолдолд Соёлын төв өргөөний хоёрдугаар давхарт байрлах түр хамгааллын байранд хүргэж, эцэг эхэд нь аюулгүй хүлээлгэн өгөх зохион байгуулалтыг хийжээ. Түүнчлэн иргэдэд зориулж 12:00–00:00 цагийн хооронд халуун хоол, ундааны цэгүүд болон дулаацах боломжтой тохилог асруудыг байршуулсан байна.
Баярын арга хэмжээ өндөрлөсний дараа буюу 00:30 цагаас эхлэн төв талбайн баруун, зүүн, урд зогсоолуудаас 18 чиглэлд их багтаамжийн 18 автобус иргэдэд үнэ төлбөргүй үйлчилнэ.
