Passion UA багийн бүрэлдэхүүнд багтсан Монгол rifler М.Азбаяр “Senzu” Бразил улсад болох IEM Rio тэмцээнд оролцохгүй болсныг багийн зүгээс албан ёсоор зарлалаа. Энэ нь тамирчны биеийн байдал, хувийн шалтгаантай холбоотой бус, харин ESL-ийн тэмцээний бүсийн дүрмийн шаардлагатай холбоотой аж.
Түүний оронд Канадын тоглогч Жастин “FaNg” Коакли stand-in тоглогчоор багт нэгдэхээр болсон байна. Ийнхүү Passion UA тэмцээнд оролцох эрхээ хадгалахын тулд бүрэлдэхүүндээ өөрчлөлт хийхээс өөр сонголтгүй болжээ.
Тус баг IEM Rio тэмцээний урилгаа 1-р сарын 5-ны өдрийн Valve Regional Standings (VRS)-ийн чансаагаар авсан юм. Тухайн үед багийн бүрэлдэхүүнд Америк тоглогчид Grim болон nicx байсан учраас Passion UA Хойд Америкийн бүсээс урилга авах шаардлагыг хангаж байв.
Гэвч 2-р сарын сүүлээр Grim-ийг сэлгээнд суулгаж, түүний оронд Senzu-г элсүүлснээр баг доторх Хойд Америкийн бүсийн тоглогчдын тоо цөөрсөн байна. ESL Pro Tour-ийн 2.7.3 дүрэмд зааснаар тухайн баг урилга авсан бүсийнхээ харьяаллыг хадгалахын тулд бүрэлдэхүүндээ тэр бүсийн тоглогчдын олонхийг хадгалсан байх ёстой. Үүнээс шалтгаалан Passion UA Хойд Америкийн харьяалалтай stand-in тоглогч авах шийдвэрт хүрчээ.
Hltv.org-ийн мэдээлснээр FaNg нь 2024 оны 3-р сард NRG багаас гарснаас хойш Хойд Америкийн хэд хэдэн багтай тоглож байсан бөгөөд хамгийн сүүлд BOSS багийн хамт PGL Bucharest-ийн хаалттай шалгаруулалтад оролцсон байна. Мөн энэ тэмцээнд тэрээр хуучин Complexity багийн хамтрагчид болох JT болон T.c нартай бараг 3 жилийн дараа дахин нэг багт тоглох болж байгаа нь онцлог болж байна.
IEM Rio тэмцээн 4-р сарын 13-нд эхлэх бөгөөд Passion UA дараах бүрэлдэхүүнтэй өрсөлдөнө:
- 🇺🇦 Kvem
- 🇿🇦 JT
- 🇺🇸 nicx
- 🇦🇷 try
- 🇨🇦 FaNg (stand-in)
- 🇿🇦 T.c (coach)
