Арван долдугаар жарны “Сүрээр дарагч” хэмээх гал морин жилийн сар шинийн баярт зориулсан хүчит 256 бөхийн барилдаан ирэх өдрүүдэд Монгол бөхийн өргөөнд зохион байгуулагдахаар товлогдлоо. Тус барилдаанд оролцох бөхчүүдийн бүртгэл болон эрх олгох үйл явц дараах хуваарийн дагуу явагдана.
Барилдааны тов ба зохион байгуулалт:
- Үндсэн барилдаан: 2026 оны 2 дугаар сарын 16 болон 17-ны өдрүүдэд 13:00 цагаас эхэлнэ.
- Эрх олгох барилдаан: Сар шинийн үндсэн барилдаанд зодоглох аймаг, цэрэг, сумын цолтой бөхчүүдийг шалгаруулах “Эрх олгох барилдаан” 2 дугаар сарын 15-ны ням гарагт 15:00 цагаас болно.
- Оролцох эрх: Улсын цолтой бөхчүүд болон чансаагаараа тэргүүлж буй аймаг, цэрэг, сумын 70-80 бөх үндсэн барилдаанд шууд оролцоно. Харин бусад бөхчүүд урьдчилсан шатны барилдаанд өрсөлдөж, үлдсэн эрхийг авах юм.
Монгол бөхийн өргөөнд болох энэхүү барилдаан нь шинэ оны хамгийн нэр хүндтэй, чансаа өндөр барилдаануудын нэгд тооцогддог билээ.
