Өртөг өсөлтийг удаашруулж болох ч бүрэн зогсоох боломжгүй гэв
Өмнөд Солонгосын Samsung Electronics нь дэлхийн хамгийн том санах ойн үйлдвэрлэгч байр сууриа хадгалсаар, мөн санах ой зэрэг гол бүрэлдэхүүнээ өөрийн төхөөрөмжүүддээ нийлүүлдэг босоо интеграцчилалтай электроник үйлдвэрлэгч хэвээр байна. Компанийн төлөөлөгчид санах ойн үнийн өсөлтийн дарамтыг өрсөлдөгчдөөсөө харьцангуй удаан хугацаанд “зөөлрүүлж” чадна гэж үзэж буй ч бүтээгдэхүүний нийт өртөг өсөх эрсдлээс бүрэн мултрах боломжгүйг илэрхийлжээ.
Энэ талаар Samsung Electronics компанийн ерөнхийлөгч, дэлхийн маркетингийн дарга Вонжин Ли Bloomberg-т өгсөн ярилцлагадаа: “Хагас дамжуулагч эд ангийн нийлүүлэлтийн асуудлууд зайлшгүй бөгөөд хүн бүрт нөлөөлөх болно. Үнэ одоо ч өсч байна. Бид энэ ачааллыг хэрэглэгчдэд шилжүүлэхийг хүсэхгүй байгаа ч эрт орой хэзээ нэгэн цагт бүтээгдэхүүний үнийг хянах шаардлагатай болно” гэж мэдэгджээ.
Зах зээлийн таамаг: 2026 оны II улирал хүртэл дахин огцом өсөх эрсдэлтэй
Counterpoint Research-ийн мэдээлснээр, 2026 оны хоёрдугаар улирлын төгсгөл гэхэд санах ойн модулиудын үнэ дахин 50 хувиар өсөх боломжтой бөгөөд өмнөх онд ч үнэ хэд хэдэн удаа өссөн гэдэг үнэлгээ гарчээ. Samsung өөрийн үйлдвэрлэсэн санах ойгоо бүтээгдэхүүндээ ашигладаг тул энэ өсөлтийн нөлөөллийг хязгаарлах давуу талтайд тооцогдож байна.
Мөн компанийн зүгээс 2026 оны зах зээлийн хүлээлтийг эерэгээр харж буйгаа илэрхийлжээ. “Бид 2026 оныг өмнөхөөсөө илүү өөдрөгөөр хүлээж байна. Хиймэл оюун ухаан бий болсноор хүмүүс шинэ технологи, ялангуяа гар утсанд хандахын тулд төхөөрөмжөө илүү идэвхтэйгээр шинэчлэх магадлалтай” гэж маркетингийн хэлтсийн дарга нэмж хэлэв.
