Сагсан бөмбөгийн дээд лигийн шинэ улирал эхэллээ

Монголын сагсан бөмбөгийн холбооны үндэсний дээд лигийн 2025-2026 оны улирал өчигдөр албан ёсоор нээлтээ хийв.

Эхний тоглолтын өмнө өнгөрсөн улирлын аварга “Хасын Хүлэгүүд” болон “Улаанбаатар Амазонс” багийн тамирчид аваргын бөгжөө гардан авсан бол урлагийн уран бүтээлчид үзэгчдэд хүндэтгэлийн тоглолт өргөлөө. Энэ улиралд онцлох нэг зүйл нь 2014, 2019 оны ДАШТ болон “Токио-2020” олимпын наадамд ажилласан олон улсын шүүгч Кинслэй Ожеабуру Монголын лигт шүүгчээр ажиллаж буй явдал юм.

Эмэгтэй лигийн эхний тоглолт

Шинэ улирлын эхний тоглолтыг “Улаанбаатар Амазонс” болон шинээр нэгдсэн “Пиратес” багууд хийсэн бөгөөд туршлагатай “Амазонс” өрсөлдөгчөө 77:50 харьцаагаар илт давуу буулгаж авлаа.

• “Амазонс”-оос Амари 23, Б.Ариунцэцэг 15, Каялэйег Труонг, Б.Болор-Эрдэнэ нар тус бүр 10 оноо авч багаа тэргүүлэв.
• “Пиратес”-аас М.Булбул 16, Т.Үлэмж 12, Б.Цацрал 11 оноо авсан ч бусад тоглогчид хангалттай үзүүлэлт гаргаж чадсангүй. Тэд довтолгооны амжилт ердөө 22 хувьтай байсан нь томоохон дутагдал байлаа.

Эрэгтэй лигийн ширүүн тоглолт

Эрэгтэйчүүдийн лигийн нээлтийн тоглолтод өнгөрсөн улирлын финалд учирсан “Хасын Хүлэгүүд” болон “Бишрэлт Металл” багууд дахин өрсөлдөв. Энэ удаад “Металл”-чууд 70:65-аар ялалт байгууллаа.

• Хожсон багаас Кристиан Брэдфорд 27, Ч.Маргад 17, Т.Ууганбаяр 14 оноо авч багаа хожилд хөтөлсөн.
• “Хүлэгүүд”-ийн гол оноочид Б.Барсболд 13, А.Азбаяр 19, Иан Миллер 13 оноо авсан ч ялалт байгуулахад хангалттай байгаагүй.

Дараагийн тоглолтын хуваарь (Дархан-Уул аймагт)

• Аравдугаар сарын 4
  • 13:10 – Завхан Бродерс vs Хасын Хүлэгүүд (эр)
  • 15:40 – Дархан Юнайтед vs Би Си Эйч Найтс (эр)
• Аравдугаар сарын 5
  • 13:10 – Аравт vs Этүгэн Ирвэсүүд (эм)
  • 15:40 – Сэлэнгэ Бодонс vs Монголианс (эр)
• Аравдугаар сарын 6
  • 18:10 – Алтан Од vs Пиратес (эм)
  • 20:40 – Бишрэлт Металл vs Эс Жи АПЭС (эр)
• Аравдугаар сарын 7
  • 18:10 – Улаанбаатар Амазонс vs АОДЭ Винкс (эм)
  • 20:40 – Дархан Юнайтед vs Ховд Шонхорууд (эр)