Барбадосын алдарт дуучин Рианнагийн эзэмшил газар руу зэвсэгтэй этгээд халдсан хэрэг гарлаа. “TMZ” хэвлэлийн мэдээлснээр, хууль хяналтын байгууллагын эх сурвалжууд уг хэргийг гуравдугаар сарын 8-ны ням гарагт Лос-Анжелес тойрогт байрлах дуучны гэрт гарсан болохыг баталжээ.
Халдлагыг 30 орчим насны эмэгтэй үйлдсэн бөгөөд тэрээр Рианнагийн харшийн гадна автомашинтайгаа ирж, хамгийн багадаа 10 удаа буудсан байна. Бууны сумны мөрүүд байшингийн хана болон хаалганд үлдсэн бөгөөд халдлага гарах үед дуучин Рианна гэртээ байсан аж. Азаар дуучин ямар нэгэн бэртэл гэмтэл аваагүй, эсэн мэнд үлдсэн байна.
Хэрэгтэн этгээд буудлага үйлдсэнийхээ дараа хэргийн газраас зугтахыг оролдсон боловч цагдаагийнхан түүнийг шуурхай баривчилжээ. Цагдаагийн нисдэг тэрэг гэрчүүдийн тодорхойлсонтой ижил төстэй автомашиныг илрүүлж, саатуулсан байна. Автомашинд нэгжлэг хийх явцад галт зэвсэг болон долоон ширхэг сумны гэр олдсон байна.
Одоогоор Рианна энэ хэргийн талаар албан ёсны тайлбар хийгээгүй байна. Мөн халдлагын үеэр түүний найз залуу, реппер A$AP Rocky болон тэдний гурван хүүхэд гэртээ байсан эсэх нь тодорхойгүй байгаа юм.
