2025 оны тавдугаар сарын 31-нд Германы Мюнхен хотноо болсон УЕФА-гийн Аваргуудын лигийн шигшээ тоглолтод Францын “Пари Сен-Жермен” (ПСЖ) клуб анх удаа түрүүлсэн ч хөгжөөн дэмжигчдийнх нь сахилга батгүй үйлдлээс үүдэн УЕФА-гаас 148 мянган еврогийн торгууль ногдуулаад байна.
Тус тоглолтын үеэр ПСЖ-ийн фанатууд талбай руу зөвшөөрөлгүй гүйн орсон, салют буудуулсан, элдэв зүйлс шидсэн, талбайн эд хогшлыг гэмтээсэн зэрэг олон зөрчил гаргасан байна. Түүнчлэн спортын ёс зүйд нийцэхгүй мэдээлэл цацсаныг ч УЕФА анхааралдаа авч, сахилгын шийтгэл оноожээ.
Тодруулбал, дараах байдлаар торгууль хүлээлгэсэн байна:
Хамгийн том торгууль болох 100 мянган еврог талбай руу орсон болон салют буудуулсан зөрчилд,
30 мянган еврог талбай руу зүйлс шидсэнтэй,
10 мянган еврог УЕФА-гийн нэр хүндийг гутаасан мэдээлэл тараасан үйлдэлд,
8 мянган еврог эд зүйлс эвдэлсэн хохиролд тус тус оноожээ.
Түүнчлэн УЕФА дараагийн зочлон тоглолтын тасалбарыг ПСЖ-ийн хөгжөөн дэмжигчдэд зарахыг хориглосон шийдвэр гаргасан байна.
Энэ нь ПСЖ-д нэр хүндийн хувьд томоохон амжилт байсан хэдий ч сахилга батын асуудал хөндөгдсөн явдал клубт сорил болж үлдлээ.
