2024 оны зургадугаар сард нийслэлийн Хан-Уул, Сүхбаатар дүүргийн нутаг дэвсгэрт 20 настай Ц.Дагвадорж 16 болон 32 настай хоёр эмэгтэйг богино хугацааны зайтай хөнөөгөөд, цогцсыг чемодан болон ханын шүүгээнд нуусан аймшигт хэрэг гарсан.
Хэргийг шалгах явцад:
- Ц.Д 16 настай Ч.Ш-ийн хоолойг цахилгааны утсаар боон амь насыг нь хохироосон.
- Түүний дараа Э.Н, Э.Г нарыг заналхийлж, цогцсыг чемоданд хийхэд хүргэн, дуу дүрсний бичлэг хийж сүрдүүлсэн.
- 32 настай Т.З-г мөн адил аргаар хөнөөж, эд зүйлсийг устгаж гэмтээсэн, хохирогчийн цахим хуудсаар дамжуулан бусдаас мөнгө шилжүүлэн авсан нь тогтоогдсон.
- Ц.Д нь 16 нас хүрээгүй Т.М-тэй бэлгийн харьцаанд орсон бөгөөд Х.Э уг үйлдлийг зуучилсан нь мөрдөн шалгах ажиллагаагаар илэрсэн.
Иймээс мөрдөн байгууллага:
- Ц.Д-г хүн алах, заналхийлэх, хулгайлах, залилах, эд хөрөнгө устгах, насанд хүрээгүй хүнтэй бэлгийн харьцаанд орох зэрэг олон зүйлчлэлээр,
- Х.Э-г насанд хүрээгүй хүнтэй бэлгийн харьцаанд оролцоход дэмжлэг үзүүлсэн гэх хэрэгт
яллагдагчаар татах санал гаргасан.
Нийслэлийн прокурорын газраас уг саналыг үндэслэлтэй гэж үзэн эрүүгийн хэрэг үүсгэн яллах дүгнэлт үйлдэж, 2024 оны 11 дүгээр сард шүүхэд шилжүүлсэн ч шүүхээс буцааж байсан.
2025 оны гуравдугаар сарын 25-нд давж заалдах шатны шүүх прокурорын эсэргүүцлийг хэрэгсэхгүй болгож, хэргийг дахин мөрдөн байцаалтад буцаасан. Шаардлагатай нэмэлт ажиллагаануудыг хийсний дараа прокурор дахин яллах дүгнэлт үйлдэж, 2025 оны наймдугаар сарын 14-нд хэргийг шүүхэд шилжүүлжээ.
Нийслэлийн прокурорын газраас: “Прокурор нь мөрдөн шалгах ажиллагаа дууссан хэргийг бүх талаас нь нягталж, цугларсан нотлох баримтыг өөрийн дотоод итгэлээр үнэлэн шүүхэд шилжүүлэх эсэхийг хараат бусаар шийддэг” гэж мэдэгдэв.
Энэхүү хэргийн урьдчилсан хэлэлцүүлгийг 2025 оны есдүгээр сарын 17-ны өдрийн 16:00 цагт хийхээр товлосон бөгөөд энэ үеэр яллагдагчдыг шүүхэд шилжүүлэх эсвэл хэргийг дахин прокурорт буцаах эсэхийг шийдвэрлэх аж.
