2026 оны жүдо бөхийн олон улсын тэмцээний салхийг хагалах Парисын Их Дуулга тэмцээнд Монгол Улсын баг тамирчид оролцохоор бэлтгэж байна. Ирэх хоёрдугаар сарын 7-ноос 8-ны өдрүүдэд үргэлжлэх тус тэмцээнд манай улсаас нийт 15 жүдоч хүч үзэхээр албан ёсоор мэдүүлгээ өгөөд байгаа юм. Олон Улсын Жүдогийн Холбоо (IJF)-ны хуанли дахь хамгийн нэр хүндтэй энэхүү тэмцээнд одоогоор дэлхийн 61 орны шилдэгүүд бүртгүүлээд байна.
Тэмцээнийг зохион байгуулагч Франц улс хамгийн олон буюу 40 тамирчнаар багаа бүрдүүлсэн бол Азийн орнуудаас БНХАУ болон БНСУ-ын багууд өргөн бүрэлдэхүүнтэй ирэхээр товлогджээ. Япон зэрэг жүдо бөхийн хүчирхэг гүрнүүд бүрэлдэхүүнээ эцэслэн зарлаагүй байгаа ч Парисын татамид өрсөлдөөн маш ширүүн болох төлөвтэй байгаа юм. Монголын багийн хувьд эрэгтэй долоо, эмэгтэй найман тамирчин эх орноо төлөөлөн барилдахаар нэрс нь тодорхой болжээ.
Парисын Их Дуулгад оролцох Монголын баг тамирчдын бүрэлдэхүүнийг танилцуулж байна.
Эрэгтэй тамирчид:
- 60 кг: Э.Ариунболд, Т.Түмэнжаргал
- 66 кг: Ё.Басхүү, Ө.Жанцандорж
- 73 кг: О.Уранбаяр, Л.Анхзаяа
- 81 кг: О.Шинэбаяр
Эмэгтэй тамирчид:
- 48 кг: Г.Наранцэцэг, Ж.Анударь
- 52 кг: М.Нандин-Эрдэнэ, Б.Уранзаяа
- 57 кг: Т.Ариунзаяа
- 63 кг: Л.Энхрийлэн
- -78 кг: А.Дуламсүрэн, О.Хүслэн
Монгол Улсын шигшээ багт олон улсын туршлагатай тамирчдаас гадна ур чадвар нь өсөж буй залуу жүдочид багтсан нь чансааны оноогоо ахиулах чухал боломж юм. Хоёр өдрийн турш үргэлжлэх энэхүү тэмцээн нь дэлхийн шилдгүүдийн хувьд бэлтгэл сургуулилалтаа сорих оны эхний том сорилт болох төдийгүй үзэгчдийн хүсэн хүлээдэг томоохон үйл явдал байх болно.
