Бүсийн төв шинэ эмчилгээ, мэс заслуудыг орон нутагт тогтмолжуулж байна
Арвайхээр хотын Аймгийн Бүсийн оношилгоо, эмчилгээний төв 2025 онд эмчилгээ, оношилгоо, мэс заслын тусламж үйлчилгээний шинэ төрлүүдийг шат дараатай нэвтрүүлснээр нийслэл хотыг зорих иргэдийн урсгалыг бууруулсан байна.
Тус төвөөс мэдээлснээр, өмнө нь зайлшгүй Улаанбаатар хот руу шилжүүлдэг байсан зарим өндөр төвшний тусламжийг орон нутагтаа хийх боломж бүрдэж, оношилгоо, эмчилгээний хүртээмж бодитоор нэмэгджээ.
Судасны болон диализтай холбоотой олон төрлийн шинэ арга хэмжээг хийж эхэлжээ
Тодруулбал, элэгний хавдрыг тэжээгч артерийн судсыг бөглөх эмчилгээ, тархины судасны цүлхийг баллон ашиглан бичил ороомгоор бөглөх арга, тархины гүрээний дотор артерын нарийсалд тэлэгч стент тавих үйлчилгээ зэргийг орон нутагт хийж байна. Мөн диализын тунель гуурс тавих эмчилгээг шинээр нэвтрүүлсэн нь бөөрний архаг өвчтэй иргэдэд цаг хугацаа, зардлын дарамтыг бууруулахад чиглэсэн алхам болжээ.
Бамбай булчирхайн мэс заслыг анх удаа хийж, нярайн үзлэгийн хүрээг өргөжүүлэв
Төвийн хувьд анх удаа бамбай булчирхайн мэс заслыг нэвтрүүлж, 50 хүнд амжилттай хийсэн байна. Үүнтэй зэрэгцэн нярайгаас төрөлхийн бамбайн дутагдлыг илрүүлж, хяналтад авах ажлыг хэрэгжүүлжээ. Ингэснээр өвчнийг эрт үед нь оношлох, цаашдын хүндрэлээс урьдчилан сэргийлэх боломжийг орон нутагт бүрдүүлсэн гэж мэдээлэв.
CRRD эмчилгээ, ангиографийн хүртээмж нэмэгдэж, хэвлийн судсан дотор эмчилгээ хийгджээ
Мөн үргэлжилсэн бөөр оруулах эмчилгээ (CRRD)-г анх удаа нэвтрүүлж, гурван хүний амь аварсан байна. Түүнчлэн ангиографийн тусламжийн хүртээмжийг нэмэгдүүлснээр хэвлийн судсан доторх эмчилгээг 38 хүнд хийсэн гэж мэдээллээ.
