Улсын хэмжээнд 2025-2026 оны өвөлжилтийн урьдчилсан төлөвийг гаргасан бөгөөд Баян-Өлгий, Увс аймгуудын ихэнх нутгаар мал өвөлжилт их хүндрэлтэй байх төлөв харагдаж байна. Энэхүү зудын урьдчилсан төлөвийг гаргахдаа ган, зуншлага, бэлчээрийн даац, ургац, цасны зузаан, агаарын температур, хур тунадасны дундажтай харьцуулсан хазайлт зэрэг олон төрлийн хиймэл дагуул болон газрын ажиглалтын мэдээлэлд үндэслэжээ.
Мал өвөлжилтийн хүндрэлийн ангилал
Энэ сарын урьдчилсан төлөвөөс харахад нийт нутгийн хэмжээнд мал өвөлжилт дараах байдлаар ангилагдаж байна:
| Хүндрэлийн зэрэг | Нийт нутгийн хувь |
| Нэн их хүндрэлтэй | 4% |
| Их хүндрэлтэй | 17% |
| Дунд зэрэг хүндрэлтэй | 33% |
| Бага хүндрэлтэй | 25% |
| Хүндрэлгүй | 21% |
Хүндрэлтэй бүс нутгууд
Урьдчилсан төлөвөөр мал өвөлжилт дараах аймгуудад хүндрэлтэй байх төлөвтэй байна:
- Их хүндрэлтэй: Баян-Өлгий, Увс аймгуудын ихэнх нутгаар.
- Дунд болон Их хүндрэлтэй: Ховд, Сэлэнгэ, Төв, Өвөрхангай, Завханы ихэнх, Говь-Алтай, Баянхонгорын зарим нутгаар.
- Дунд зэрэг хүндрэлтэй: Хөвсгөл, Архангай, Булган, Дундговийн ихэнх нутгаар.
Цаг үеийн зөвлөмж
Цаг уурын байгууллагаас мал өвөлжилт хүндэрч буй болон хүндрэх магадлалтай бүс нутгийн малчдад дараах зүйлд онцгойлон анхаарч ажиллахыг зөвлөж байна: Мэдээлэл тогтмол авах: Цаг уурын байгууллагаас гаргадаг богино, дунд, урт хугацааны цаг агаарын урьдчилсан мэдээ, шинэчлэн гаргах зудын төлөвийн мэдээг тогтмол авч, үйл ажиллагаандаа ашиглах. Урьдчилсан бэлтгэл: Цагийн байдал хүндэрсэн тохиолдолд хэрэгжүүлэх арга хэмжээний урьдчилсан бэлтгэлийг бүрэн хангаж ажиллах.
