Нийслэлийн хэмжээнд томуу, томуу төст өвчний тархалт огцом нэмэгдэж буйтай холбоотойгоор өрхийн эрүүл мэндийн төвүүдийн ажиллах цагийг түр хугацаанд уртасгахаар болжээ. Ингэснээр иргэд орой хүртэл харьяа ӨЭМТ-дөө үзүүлж, хүүхэд томчуудын анхан шатны тусламж, зөвлөгөөг ойр гэртээ авах боломж нэмэгдэж байна.
Шинэ цагийн хуваарь нь дараах байдалтай:
- Ажлын өдөр: 08:30–20:00
- Амралтын өдөр: 11:00–18:00
- Бүх нийтийн амралтын өдөр: 11:00–17:00
Өнгөрсөн долоо хоног, буюу 11-р сарын 17-ноос хойш нийслэлд томуу, томуу төст өвчний тархалт эрс өссөн тул ХӨСҮТ вирус судлалын шинжилгээ хийж, орчилд томуугийн А хүрээний вирус давамгай байгааг тогтоожээ. Үүнтэй зэрэгцэн нийслэлийн Эрүүл мэндийн газраас эмнэлгүүдийн орны хүрэлцээг нэмэгдүүлэх арга хэмжээ авч, 1200 гаруй нэмэлт ор дэлгэснээс гадна, дэгдэлтийн оргил үед 1500 ба түүнээс дээш болгохоор төлөвлөн ажиллаж байна.
Нийслэлийн эмнэлгүүдийн ачаалал ч мэдэгдэхүйц өсжээ. Хүлээн авах, яаралтай тусламжийн тасгуудаар сүүлийн шөнө 2420 хүн үйлчлүүлсэн нь өмнөх өдрөөс 200-аар их байсан бол Түргэн тусламжийн “103” төвд 2787 дуудлага ирж, гэрийн үзлэг, яаралтай тусламж үзүүлсэн байна. Энгийн үед түргэн тусламжийн дуудлагын ойролцоогоор 30 хувийг хүүхэд, 70 хувийг насанд хүрэгчид эзэлдэг байсан бол одоогийн байдлаар энэ харьцаа 50:50 болж өөрчлөгдсөн нь хүүхдийн өвчлөл эрс нэмэгдсэнийг харуулж байна.
Эдгээр нөхцөл байдлын улмаас өрхийн эмнэлгүүдийг уртасгасан цагаар ажиллуулах, дүүргүүдийг бүсчилж, бүс тус бүрт ӨЭМТ болон хүүхдийн кабинетыг орой хүртэл нээлттэй байлгах бэлтгэлийг хангаж буйг нийслэлийн Эрүүл мэндийн газрын дарга Б.Батцоож мэдэгдэв. Ингэснээр хөнгөн хэлбэрийн томуу, томуу төст өвчний үед заавал том эмнэлэгт очихгүйгээр, өрхийн түвшинд эмчилгээ, ажиглалт, өдрийн эмчилгээ хийх боломжийг нэмэгдүүлэх зорилготой.
Мөн Засгийн газраас хүүхэд нь томуу, томуу төст өвчнөөр өвдсөн тохиолдолд эцэг, эх, асран хамгаалагчид таван хүртэл хоногийн цалинтай чөлөө олгох шийдвэр гаргаад байна. Хүүхэд халуурах, ханиалгах, томуугийн шинж тэмдэг илэрвэл харьяа ӨЭМТ-дээ хандаж, эмчийн хуудсыг үндэслэн албан байгууллагаасаа цалинтай чөлөө авах эрх нь нээлттэй юм гэж НЗДТГ, ХМОНХХ-оос мэдээллээ.
