OpenAI компани албан ёсны цахим хуудсаараа дамжуулан анагаах ухаан, эрүүл мэндийн асуултуудад тусгайлан зориулсан ChatGPT-ийн шинэ хэсгийг ашиглалтад оруулснаа зарлалаа. Тус компанийн мэдээлснээр долоо хоног бүр 230 сая гаруй хэрэглэгч чатботоос эрүүл мэндийн талаар зөвлөгөө авдаг тул энэ сэдвийг бие даасан хэлний модель болгон хөгжүүлэх шийдвэр гаргажээ.
Энэхүү шинэ хэсэг нь хэрэглэгчийн хувийн мэдээллийг харгалзан үзэхээс гадна илүү оновчтой зөвлөмж өгөхийн тулд Apple Health, Function, MyFitnessPal зэрэг платформтой холбогдох боломжтой юм. ChatGPT Health нь дараах үндсэн чиглэлүүдэд туслалцаа үзүүлнэ:
- Эмчийн үзлэгт орох бэлтгэл хангах;
- Эрүүл мэндийн үзүүлэлтүүдэд дүн шинжилгээ хийх;
- Зөв зохистой хооллолтын талаар зөвлөгөө өгөх.
OpenAI-ийн зүгээс энэхүү шинэчлэл нь онош тавих эсвэл эмчилгээ хийх зориулалтгүй гэдгийг онцлон тэмдэглэжээ. Үүний гол зорилго нь хэрэглэгчдэд өдөр тутмын эрүүл мэндийн асуудлаа илүү сайн ойлгох, биеийн байдлын өөрчлөлтийн зүй тогтлыг хянахад туслах, улмаар мэргэжлийн эмчид хандах үедээ илүү мэдээлэлтэй, бэлтгэлтэй байхад чиглэсэн байна.
ChatGPT Health хэсгийг хөгжүүлэх ажилд 260 гаруй эмч мэргэжилтэн оролцсон бөгөөд компани нейро сүлжээний ажиллагааны талаар 600 мянга гаруй санал хүсэлтийг цуглуулж дүн шинжилгээ хийжээ. Одоогоор уг функц нь хязгаарлагдмал тооны хэрэглэгчдэд нээлттэй байгаа бөгөөд сонирхсон хүмүүс хүлээлгийн жагсаалтад бүртгүүлэх боломжтой юм.
Сонирхолтой санагдлаа, өдөр тутмын жижиг зөвлөгөө авахад хэрэгтэй юм байна
Эмчийг орлохгүй ч анхан шатны мэдээлэл авахад зүгээр л юм