Иран дахь Израиль болон АНУ-ын цэргийн ажиллагааны улмаас Персийн булангаас нийлүүлдэг газрын тос, шингэрүүлсэн байгалийн хийн (ШБХ) тээвэрлэлтэд саатал гарч эхэллээ. Үүний нөлөөгөөр эрчим хүчний нүүрсний биржийн үнэ ердөө нэг хоногийн дотор 8.6%-иар өсөж, 2024 оны 12 дугаар сараас хойших хамгийн дээд түвшинд хүрсэн талаар Bloomberg агентлаг мэдээллээ.
Mongolnews24.com сайтын дамжуулснаар, Азийн зах зээлийн жишиг үзүүлэлт болох Австралийн Ньюкасл боомтын нүүрсний үнэ тонн тутамдаа 128.7 ам.долларт хүрчээ. Үүнийг дагаад Австралийн нүүрс олборлогч “Whitehaven Coal Ltd.” болон “New Hope Corp.” компаниудын хувьцааны ханш 5-аас дээш хувиар өссөн байна.
Эрчим хүчний хямрал ба ШБХ-ийн хомсдол
Худалдан авагчид шингэрүүлсэн байгалийн хийн нийлүүлэлт урт хугацаагаар тасалдах магадлалд бэлтгэж байна. Учир нь:
- Катарын Рас-Лаффан дахь үйлдвэр Ираны дроны халдлагад өртсөний улмаас 30 жилийн түүхэндээ анх удаа үйл ажиллагаагаа зогсоожээ.
- Тус үйлдвэр нь дэлхийн нийт ШБХ-ийн нийлүүлэлтийн 20 орчим хувийг дангаараа бүрдүүлдэг бөгөөд хэзээ ашиглалтад орох нь тодорхойгүй байна.
Үүссэн нөхцөл байдалтай холбоотойгоор Европын зах зээл дээрх хийн үнэ 1,000 шоо метр тутамдаа 550 ам.доллароос давсан нь 2025 оны 2 дугаар сараас хойших анхны тохиолдол болов.
Азийн эдийн засагт учрах эрсдэл
The New York Times (NYT) сонины дүгнэснээр, Ормузын хоолойгоор дамжих эрчим хүчний тээвэрлэлт саатсан нь Азийн томоохон эдийн засагтай орнуудад ноцтой эрсдэл учруулж байна. Тухайлбал:
- Хятад улс нийт газрын тосныхоо тал орчим хувийг Ойрхи Дорнодоос импортолдог.
- Хэрэв зэвсэгт мөргөлдөөн удаан үргэлжилбэл тус улсын эрчим хүчний аюулгүй байдал болон эдийн засагт хүнд цохилт болохоор байна.
Энэ өсөлт удаан үргэлжилбэл манайд эерэг нөлөөтэй байх болов уу