Хичээлийн шинэ жил эхэлж, авто замын түгжрэл нэмэгдэхээс урьдчилан сэргийлэх зорилгоор Нийслэлийн Иргэдийн Төлөөлөгчдийн Хурлын (НИТХ) дарга А.Баяр авто замын нэгдүгээр эгнээг бүрэн чөлөөлж, нийтийн тээврийн хөдөлгөөнийг сайжруулах тухай захирамж гаргасан. Энэ хүрээнд Энхтайваны өргөн чөлөөний нэгдүгээр эгнээг чөлөөлж, нийтийн тээврийн автобусны урсгалыг хөнгөвчлөөд байна. НИТХ-ын дарга А.Баяр уг захирамжийн хэрэгжилттэй өнөөдөр танилцлаа.
Нэгдүгээр эгнээний чөлөөлөлтийн үр дүн
Нийтийн тээврийн бодлогын газрын дарга Д.Отгонжаргал ажлын явцын талаар мэдээлэл өгсөн бөгөөд: “Энхтайваны өргөн чөлөөний нэгдүгээр эгнээг чөлөөлснөөр автобусны саадгүй зорчих нөхцөл бүрдсэн. Үүний үр дүнд:
- Автобус хоорондын хүлээлтийн хугацаа 8-10 минутаас 3-5 минут болж буурсан.
- Нийтийн тээврийн автобусны хурд 4.5 км/цаг нэмэгдэж, одоо 13.5 км/цаг хүрсэн. Ойрын өдрүүдэд хөдөө орон нутгаас нийслэл рүү чиглэх автомашины тоо 3-5 дахин, замын ачаалал 5 дахин нэмэгдэж байгаа энэ үед нэгдүгээр эгнээг чөлөөлснөөр автобусны хүртээмж сайжирч, хүлээлгийн зай багассан” гэж онцлов.
Жишээлбэл, М:1 чиглэлийн Таван Шараас Офицеруудын ордон хүртэлх автобусны зорчих хугацаа өмнө нь 110 минут байсан бол одоо 90 минут болж буурчээ. Мөн Замын цагдаагийн газраас мэдээлснээр, нэгдүгээр эгнээгээр автобус саадгүй явж эхэлснээр томоохон уулзваруудад зохицуулалт хийх замын цагдаагийн ачаалал мэдэгдэхүйц хөнгөрсөн байна.
Цаашдын төлөвлөгөө
НИТХ-ын дарга А.Баяр: “Нийслэлийн иргэд хүссэн газраасаа зорьсон цагтаа автобусаар саадгүй зорчдог болгохын тулд шат дараатай арга хэмжээ авч байна. Эхний ээлжид Таван Шараас Офицеруудын ордон хүртэлх нэгдүгээр эгнээг чөлөөлсөн. Дараагийн шатанд:
- 3, 4-р хорооллоос 100 айлын зам дагуу Цайз 16 хүртэлх авто замын нэгдүгээр эгнээ
- Хан-Уул дүүргийн 120 буюу Тэмээтэй хөшөөнөөс Нисэхийн тойрог хүртэлх замын нэгдүгээр эгнээг чөлөөлж, нийтийн тээврийг саадгүй зорчуулах боломжийг судалж байна” гэлээ.
Иргэдийн санал, хүндрэл
Иргэд нэгдүгээр эгнээг чөлөөлж, автобусыг саадгүй зорчих боломжтой болгосон шийдвэрийг дэмжиж байна. Тэдний үзэснээр, хэрвээ бүх чиглэлд ийм зохицуулалт хийгдвэл нийтийн тээврээр үйлчлүүлэх хүсэлтэй иргэдийн тоо нэмэгдэж, замын түгжрэл буурна. Гэсэн хэдий ч иргэдээс дараах саналыг хэлжээ:
- Зарим автобус чиглэлээ зарладаггүй тул харааны бэрхшээлтэй иргэд болон ахмадууд буудал андуурч, буухад хүндрэл учирч байна.
Нэмэлт арга хэмжээ
Одоогоор Улаанбаатар хотын гол гудамж, замын 15 байршилд нэгдүгээр эгнээнд саад учруулж буй автомашинуудыг цэгцлэх ажил үргэлжилж байна. Нийтийн тээврийн бодлогын газраас 38 албан хаагч автобусны буудлуудад зөвшөөрөлгүй зогссон болон түр зогссон тээврийн хэрэгслийн хөдөлгөөнийг зохицуулж байна.
