“Намрын ногоон өдрүүд-Үндэсний үйлдвэрлэл 2025” арга хэмжээ энэ бямба гарагт Төв цэнгэлдэх хүрээлэнгийн гадна талбайд нээлтээ хийхээр болж байна. Энэхүү нэгдсэн үзэсгэлэн худалдаа 20 дахь жилдээ зохион байгуулагдаж байгаа нь уламжлал болон төлөвшсөн, хүлээлттэй арга хэмжээ гэдгийг илтгэнэ.
Хүнс, хөдөө аж ахуй, хөнгөн үйлдвэрийн яам, НҮБ-ын ХХААБ болон Улаанбаатар хотын Захирагчийн ажлын алба хамтран уг арга хэмжээг 2025 оны есдүгээр сарын 22-28-ны хооронд зохион байгуулахаар төлөвлөсөн байна.
Үзэсгэлэн худалдаанд оролцогчид эх орныхоо хөрсөнд ургуулсан эрүүл, баталгаатай шинэ ургацын ногоо, дотоодын хүнсний үйлдвэрүүдийн мах, махан бүтээгдэхүүн, сүү, сүүн бүтээгдэхүүн зэргийг худалдан авах боломжтой. Мөн ноос, ноолуур болон арьс, ширэн бүтээгдэхүүнүүдийг хэрэглэгчдийн гарт хүргэж, үндэсний үйлдвэрлэлийн чанарыг харуулах зорилготой.
