Тулгар төрийн 2234 жил, Их Монгол Улс байгуулагдсаны 819 жил, Үндэсний эрх чөлөө, тусгаар тогтнолоо сэргээн мандуулсны 114 жил, Ардын хувьсгалын 104 жилийн ойг тэмдэглэх Үндэсний их баяр наадмын бэлтгэл ажлууд эрчимтэй үргэлжилж байна.
Энэ жилийн баяр наадмын ерөнхий найруулагчаар Монгол Улсын Төрийн соёрхолт, Урлагийн гавьяат зүтгэлтэн найруулагч Н.Наранбаатар ажиллаж байгаа бөгөөд баярын арга хэмжээнүүдийг “Мөнхөд гэрэлтэх Монгол” уриан дор зохион байгуулахаар төлөвлөжээ.
Наадмын нээлтийн тоглолтыг энэ жил хоёр удаа хүргэх бөгөөд оройн тоглолт нь долдугаар сарын 11-ний 21:00 цагт болно. Энэ удаагийн тоглолт нь тайзны уран бүтээл, дэлгэцийн дүрслэл, гэрэлтүүлэг, техник технологийн шийдлүүдийг хослуулсан орчин үеийн урлагийн шоу хэлбэрээр үзэгчдэд хүрэх юм.
Оройн тоглолтод 2500 гаруй уран бүтээлч оролцох бөгөөд тасалбарын үнэ 80,000 төгрөг. Тасалбаруудыг enaadam.mn болон ticket.mn цахим хуудсаар худалдаалж байна.
