Монголын үндэсний олимпын хорооны ээлжит IX чуулган өнөөдөр зохион байгуулагдаж, ирэх дөрвөн жилд тус байгууллагыг удирдах бүрэлдэхүүнийг сонголоо. Нийт 171 гишүүн оролцох ёстойгоос 136 төлөөлөгч хүрэлцэн ирснээр ирц бүрдэж, санал хураалт явуулсан байна.
Тус хорооны ерөнхийлөгчийн албан тушаалд Олон улсын олимпын хорооны гишүүн Б.Баттүшиг дахин итгэл хүлээж, улиран сонгогдсон юм. Тэргүүн дэд ерөнхийлөгчийн төлөөх өрсөлдөөнд одоогийн албан тушаалтан Ч.Наранбаатар 111 гишүүний саналаар ялалт байгуулж, үүрэгт ажлаа үргэлжлүүлэхээр болов.
Дэд ерөнхийлөгчийн суудалд зургаан хүн нэрээ дэвшүүлснээс Ч.Зоригтбаатар, Г.Ерөөлбат, Я.Содбаатар нар нэрээ татсан тул үлдсэн гурван нэр дэвшигчийн дунд өрсөлдөөн өрнөсөн байна. Үүний үр дүнд Монголын ширээний теннисний холбооны төлөөлөл Ц.Гантулга 95 санал авснаар МҮОХ-ны дэд ерөнхийлөгчийн албанд томилогдлоо.
Гүйцэтгэх зөвлөлийн гишүүн болохоор 14 хүн өрсөлдсөнөөс хамгийн олон санал авсан долоон гишүүнийг баталсан байна. Харин УИХ-ын гишүүн Ч.Номин болон А.Ганбаатар нар нэрээ татаж, сонгуулийн өрсөлдөөнөөс гарчээ. Сонгогдсон долоон гишүүн нь:
- Г.Ерөөлбат (Монголын гимнастикийн холбоо)
- Я.Содбаатар (Монголын чөлөөт бөхийн холбоо)
- П.Буяндэлгэр (Удирдах зөвлөлийн гишүүн)
- Л.Мягмаржав (Монголын 3х3 сагсан бөмбөгийн холбоо)
- Д.Болормаа (Монголын тэшүүрийн холбоо)
- Ц.Сандуй (Монголын триатлоны холбоо)
- Д.Энхтөр (Монголын дугуйн холбоо)
Ийнхүү МҮОХ-ны удирдлагын баг шинэчлэгдэн бүрдэж, ирэх олимпын мөчлөгт спортын салбарын бодлогыг тодорхойлохоор боллоо. Сонгогдсон удирдлагууд олимпын хөдөлгөөнийг хөгжүүлэхэд чиглэсэн үйл ажиллагаагаа нэн даруй эхлүүлэхээр төлөвлөж байна.
