“Чингис хаан” Үндэсний музейн хамт олон байгуулагдсан цагаасаа эхлэн дэлхийн өнцөг булан бүрт буй Монголын эзэнт гүрний түүхэн дурсгалуудыг олж илрүүлэх, тэдгээрийг хуулбарлан эх нутагтаа авчрах ажлыг тасралтгүй гүйцэтгэж ирсэн билээ. Энэхүү нөр их ажилд Япон Улсын өргөмжит консул Каваүчи Широ үнэлж баршгүй хувь нэмэр оруулж, Чингис хааны “Алтан гэрэгэ”-ний А хуулбарыг Японы “Тэнри” их сургуулиас хувилж авах зөвшөөрлийг бүрдүүлэхэд онцгой зүтгэл гаргасан юм. Түүний хичээл зүтгэлийн ачаар монголчууд өөрсдийн түүхийн хосгүй дурсгалыг эх орондоо бодитоор үзэж, мэдрэх ховорхон боломжтой болжээ.
Тэрээр зөвхөн эх газрын түүх бус, Монголын эзэнт гүрэн далай тэнгист ч хүчирхэг байсныг гэрчлэх Хубилай хааны усан флотын холбогдох ховор дурсгалуудыг музейн санд хүлээлгэн өгсөн байна. Японы Эзэн хааны “Эрдэнэсийн сан”-д хадгалагддаг Хубилай хааны довтолгооны үеийн дайны зургууд нь Японы хосгүй үнэт үзмэрт тооцогддог тул дахин хувилахыг нь хуулиар чанд хориглосон байдаг аж. Эдгээр үзмэрүүд нь манай өвөг дээдсийн цэргийн урлаг, түүхийн цар хүрээг дэлхий дахинд бодитойгоор сурталчлахад чухал ач холбогдолтой юм.
Каваүчи Широгийн музейн сан хөмрөгт оруулсан гол хувь нэмэр:
- Японы “Тэнри” их сургуулийн музейгээс авсан Чингис хааны “Алтан гэрэгэ”-ний А хуулбар.
- Хубилай хааны Японд хийсэн довтолгооны үеийн түүхэн зургуудын хуулбар.
- Юань Улсын үеийнх байх магадлалтай эртний сэлмийн хуулбар.
- Их Юань Улсын хаан Хубилайгаас Японы эзэн хаанд илгээсэн албан захидлын хуулбар.
Академич С.Чулуун 2026 оны гуравдугаар сарын 5-ны өдөр Каваүчи Широг хүндэтгэн хүлээн авч, музейн танхимуудыг биечлэн тайлбарлаж, талархлын бичиг гардууллаа. Музейн захирал түүнийг Монголын түүхийн гайхамшгийг үзэгчдэд мэдрүүлэхэд үнэтэй хувь нэмэр оруулсан гавьяатан хэмээн өндрөөр үнэлсэн юм. Каваүчи Широ ийм өндөр хүндэтгэл авсандаа сэтгэл ихэд хөдөлж байгаагаа илэрхийлээд, цаашид ч Монголын түүхийг судлах үйлсэд өөрийн зүгээс шалтгаалах бүхнийг хийхээ амласан байна.
