Монгол Улсын Их Хурлын дарга Дашзэгвийн Амарбаясгалан 2025 оны 3-р сарын 18-наас 23-ны өдрүүдэд Их Британи, Умард Ирландын Нэгдсэн Вант Улсад албан ёсны айлчлал хийж байна.
Энэ хүрээнд тэрээр 3-р сарын 20-ны Пүрэв гарагт Их Британийн Засгийн газрын дэмжлэгтэйгээр байгуулагдсан Сансрын хэрэглээний инновацын Катапульт төв-д зочиллоо.
Тус төв нь дэлхий даяарх анхны хиймэл дагуулууд хөөргөгдсөн 1970 оноос хойш сансрын мэдээллийг ашиглан хүрээлэн буй орчин, газар тариалан, хот төлөвлөлт, уул уурхай зэрэг салбарт судалгаа, хөгжүүлэлт хийж, хувийн хэвшилтэй хамтран ажилладаг.
Тухайлбал, Катапульт төв нь хиймэл дагуулын өгөгдлийг ашиглан газар тариаланд тохиромжтой хөрсийг тодорхойлох, нар болон салхины цахилгаан станцын байршлыг оновчтой сонгох, уул уурхайн нөлөөллийг судлах зэрэг чиглэлд ажилладаг байна.
Түүнчлэн, тус төвд Оксфордын их сургуулийн докторын зэрэг хамгаалсан, “Keeley Scholar” тэтгэлэг хүртсэн, Их Британийн “хамгийн авьяастай 10 залуу судлаачийн нэг” хэмээн үнэлэгдсэн монгол иргэн Б.Марал ахлах зөвлөхөөр ажиллаж байгаа нь онцлог үйл явдал байв.
Айлчлалын үеэр парламентын дарга Амарбаясгалан төвийн үйл ажиллагаатай танилцаж, хиймэл оюун ухаан, дэвшилтэт технологи, “ногоон” хөгжил, хөдөлмөрийн зах зээл зэрэг шинэ салбар дахь хамтын ажиллагааны боломжуудыг хэлэлцлээ.
