2025 оны 8-р сарын 15–19-нд БНХАУ-ын Бээжин хотод болсон RobotChallenge олон улсын роботын аварга шалгаруулах тэмцээнд Монголын баг нийт 18 медаль хүртэж амжилттай оролцлоо. Тэд 6 алт, 7 мөнгө, 5 хүрэл медальтай эх орондоо ирлээ.
Монгол Улсыг төлөөлөн 100 гаруй роботчин оролцсон бөгөөд тэдний дунд Монголын Роботын хөгжлийн холбоо, “Шинэ эрин”, “Монгол тэмүүлэл” багууд, Улаанбаатар хотын 44-р сургуулийн сурагчид, “Орхон Эмпати” баг болон Өмнөговь аймгийн Ханбогд сумын 2-р сургуулийн баг багтжээ.
RobotChallenge тэмцээн 2004 оноос зохион байгуулагдаж байгаа бөгөөд энэ жил 42 улсын 5000 гаруй оролцогч хүч үзсэн байна. Монгол Улс 2018 оноос тус тэмцээнд оролцож эхэлсэн бөгөөд энэ удаад тав дахь удаагаа оролцож, дөрөв дэх удаагаа “Робот-регби” төрөлд түрүүллээ.
Энэхүү аварга шалгаруулах тэмцээн жил ирэх тусам өргөжин тэлж, өнөөдөр дэлхийн хамгийн том хиймэл оюун ашигласан роботын уралдааны нэг болж, 82 орны тамирчдыг нэгтгэж байна.
