Монгол Улсын Засгийн газар болон Монголын Үндэсний Худалдаа Аж Үйлдвэрийн Танхим хамтран 2024 оны ТОП-100 аж ахуйн нэгжийн жагсаалтыг 24 дэх удаагаа албан ёсоор зарлалаа.
Эдийн засгийн өсөлтөд бизнесийнхэн гол үүрэг гүйцэтгэж байна
Ерөнхий сайд Гомбожавын Занданшатар шагнал гардуулах ёслолд оролцохдоо бизнес эрхлэгчид, үйлдвэрлэгчид, аж ахуйн нэгжүүдэд талархал илэрхийлэв. Тэрбээр хэлэхдээ, 2024 онд Монголын эдийн засаг 4.9%-иар өсөж, дотоодын нийт бүтээгдэхүүн (ДНБ) 80 их наяд төгрөгт хүрсэн нь аж ахуйн нэгжүүдийн хувь нэмрийн үр дүн гэж тодотгосон юм.
- Борлуулалтын орлого нь улсын ДНБ-ий 70 хувийг бүрдүүлж байна
- ТОП-100 ААН нийт татварын орлогын 28 хувийг бүрдүүлэв
- Ажил эрхлэлтэд 87,500 хүнийг шууд хамруулсан (нийт ажиллах хүчний 6.5%)
Хууль эрх зүйн орчныг сайжруулахад анхаарна
Ерөнхий сайд Занданшатар намрын чуулганаар дараах гол хуулиудыг өргөн барихаар төлөвлөж буйгаа мэдэгдэв:
- Төр, хувийн хэвшлийн түншлэлийн тухай хууль
- Татварын шинэчлэл
- Худалдан авах ажиллагааны шинэчлэл
- МҮХАҮТ болон мэргэжлийн холбооны эрх зүйн орчин
Тэрбээр “Засгийн газар хүний нөөцийн хөгжил, чанартай ажлын байр нэмэгдүүлэх, нийгмийн халамжаас хөдөлмөрт шилжих үйл явцыг бизнесийн салбартай хамтран хэрэгжүүлнэ” хэмээн онцолж, төр-хувийн хэвшлийн хамтын ажиллагааг бэхжүүлэхийг уриаллаа.
ТОП-100 жагсаалтыг уул уурхайн компаниуд тэргүүлэв
2024 оны ТОП-100 ААН-ийг дараах чиглэлийн компаниуд голлон бүрдүүлжээ:
- Уул уурхай
- Худалдаа, үйлдвэрлэл, үйлчилгээ
- Банк, санхүү
Мөн онцлох үзүүлэлтүүд:
- 14 нээлттэй хувьцаат компани жагсаалтад багтсан нь түүхэн дээд үзүүлэлт болов
- 24 гадаадын хөрөнгө оруулалттай компани,
- 25 экспортлогч аж ахуйн нэгж, үүнээс 5 нь ашигт малтмалын бус бүтээгдэхүүн экспортолж байна
