Монгол Улсын гадаад валютын албан нөөц богино хугацаанд 5 тэрбум ам.долларт хүрсэн тухай Сангийн сайд Б.Жавхлан мэдээлэв.
Экспортын хэмжээг нэмэгдүүлэх, тулгамдаж буй асуудлуудыг шуурхай шийдвэрлэх зорилго бүхий ажлын хэсэг арилжааны банкуудтай уулзалт хийж, валютын нөөцийг хамгаалах, хамтын ажиллагааг сайжруулах талаар хэлэлцжээ. Энэ хүрээнд Санхүүгийн тогтвортой байдлын зөвлөлөөс бодлогын зөвлөмж гаргасан бөгөөд хэрэгжилт нь үргэлжилж байна.
2025 оны эхний улиралд Монгол Улс 17.4 сая тонн нүүрс, 1.8 сая тонн төмрийн хүдэр экспортолж, өнгөрсөн жилийн мөн үеийн үзүүлэлттэй дүйцсэн байна. Зэсийн баяжмалын экспорт 456 мянган тоннд хүрч, 24 хувиар өссөн нь валютын урсгалыг нэмэгдүүлжээ.
Харин энэ сарын эхний байдлаар валютын нөөц өмнөх долоо хоногтой харьцуулахад 305 сая ам.доллараар нэмэгдсэн байна.
