2025 оны гуравдугаар сарын 19-ний Пүрэв гарагт Энэтхэгийн нийслэл Шинэ Дели хотноо Монгол Улсын Гадаад харилцааны яам болон Бүгд Найрамдах Энэтхэг Улсын Гадаад хэргийн яамны хооронд тав дахь удаагийн зөвлөлдөх уулзалт амжилттай зохион байгуулагдлаа.
Уулзалтаар Монгол Улсын ГХЯ-ны Төрийн нарийн бичгийн дарга Лханаажавын Мөнхтүшиг Монгол Улс Энэтхэгийг “гурав дахь хөрш” бөгөөд “сэтгэлийн хөрш” хэмээн нэрлэж, бүс нутгийн болон олон улсын тавцанд хамтын ажиллагаагаа гүнзгийрүүлэх нь нэн чухал ач холбогдолтойг онцолсон юм.
Хамтын ажиллагааны өргөн хүрээт асуудлуудыг хэлэлцэв
Хоёр тал улс төр, эдийн засаг, худалдаа, уул уурхай, мэдээлэл технологи, боловсрол, соёлын салбар дахь хамтын ажиллагаа болон бүс нутгийн болон олон улсын байгууллагын хүрээнд харилцан дэмжлэг үзүүлэх асуудлаар санал солилцов.
Мөн 2025 онд тохиох Монгол, Энэтхэгийн дипломат харилцаа тогтоосны 70 жилийн ойн хүрээнд дээд түвшний айлчлал, арга хэмжээнүүдийг зохион байгуулах талаар ярилцсан байна.
Нефть боловсруулах үйлдвэрийн төслийг онцоллоо
Хэлэлцээний явцад хоёр тал хамтын ажиллагааны төсөл, хөтөлбөрүүд амжилттай хэрэгжиж байгааг тэмдэглэж, Монгол Улсын Засгийн газрын 14 их бүтээн байгуулалтын төслийн нэг болох нефть боловсруулах үйлдвэрийг цаг хугацаанд нь ашиглалтад оруулахын төлөө идэвхтэй хамтран ажиллахаа бататгалаа. Энэ үйлдвэр нь хоёр орны стратегийн түншлэлийн бэлгэдэл юм.
Олон улсын байгууллагын хүрээнд хамтын ажиллагааг үргэлжлүүлнэ
Гадаад харилцааны яамнаас мэдээлснээр, Монгол, Энэтхэг хоёр улс НҮБ болон бусад олон улсын байгууллагын хүрээнд харилцан дэмжлэг үзүүлэх, хамтран ажиллах бэлэн байгаагаа илэрхийлжээ.
