Италид зохион байгуулагдаж буй “Милан Кортина 2026” өвлийн Паралимпын наадам үргэлжилж байна. Энэхүү наадамд Монгол Улсаас нийт 3 тамирчин оролцож, пара спортын төрөлд хүч сорьж байгаа юм.
Өчигдөр гүйлтийн цанын тэмцээний дундын зай буюу 10 км-ийн уралдаан явагдлаа. Нийт 25 тамирчин гараанд гарч, сонгомол техникээр өрсөлдсөн байна.
Монголын тамирчдаас ОУХМ Б.Ганболд 10 км-ийн зайг 34:40 цагийн амжилтаар туулж 21 дүгээр байр эзэлсэн бол ОУХМ Ц.Дашдорж 34:49 цагийн үзүүлэлтээр барианд орж 22 дугаар байранд шалгарлаа.
Пара гүйлтийн цанын төрөлд өрсөлдөж буй Монголын хоёр тамирчин дараагийн гараагаа 3 дугаар сарын 15-ны өдөр хийнэ. Тэд энэ өдөр 20 км-ийн холын зайн уралдаанд хүч сорих хуваарьтай байна.
