YouGov байгууллагаас 2026 оны 2-р сарын эхээр явуулсан шинэ судалгаагаар Мелани Трамп АНУ-ын түүхэн дэх хамгийн бага нэр хүндтэй тэргүүн хатагтай нарын хоёрдугаарт бичигдсэн байна. Нийт 2255 америк хүнийг хамарсан уг судалгаагаар сүүлийн 11 тэргүүн хатагтайг “гайхалтай”-аас “муу” хүртэлх шатлалаар үнэлүүлжээ.
Судалгаанд оролцогчдын 36% нь Мелани Трампыг “муу”, 10% нь “дунджаас доогуур” гэж үнэлснээр түүний цэвэр рейтинг -16 оноотой гарсан байна. Харин хамгийн бага нэр хүндтэй тэргүүн хатагтайгаар Хиллари Клинтон тодорсон бөгөөд түүний цэвэр рейтинг -17 оноотой байв. Үүний эсрэгээр Жаклин Кеннеди +56 оноогоор жагсаалтыг тэргүүлсэн бол Розалин Картер (+31) болон Нэнси Рейган (+25) нар удаах байруудад бичигджээ. Мөн Мишель Обама судалгаанд оролцогчдын 33%-ийн “гайхалтай” гэх үнэлгээг авч, +21 оноотойгоор фаворит хатагтай нарын нэг болсон байна.
Ерөнхийлөгчид болон тэргүүн хатагтай нарын нэр хүндийг харьцуулахад ихэнх хатагтай нар нөхрөөсөө илүү өндөр үнэлгээ авдаг болох нь ажиглагджээ. Тухайлбал, Жаклин ба Жон Кеннеди, Мишель ба Барак Обама нар ижил түвшний эерэг үнэлгээ авсан бол Мелани болон Дональд Трамп нар хоёулаа сөрөг үнэлгээ авсан байна. Дональд Трампын хувьд судалгаанд багтсан 20 ерөнхийлөгчөөс хамгийн бага үнэлгээг авсан бөгөөд оролцогчдын 48% нь түүнийг “муу” гэж үзжээ. Трампын дараах хамгийн бага нэр хүндтэй ерөнхийлөгчөөр Жо Байден тодорч, оролцогчдын 38% нь түүнд “муу” үнэлгээ өгсөн байна. Сонирхолтой нь, Хиллари Клинтон нөхөр Билл Клинтоноос хамаагүй доогуур үнэлгээ авсан цорын ганц тэргүүн хатагтай болжээ.
