Газрын тухай хуульд оруулах шинэ нэмэлт, өөрчлөлтөөр малчид болон нийгмийн зорилтот бүлгийн иргэдэд газар эзэмших таатай нөхцөл бүрдэж байна. Засгийн газрын 2026 оны хоёрдугаар сарын 25-ны хуралдаанаар хэлэлцсэн энэхүү хуулийн төсөл нь газар олголтын шат дамжлагыг цөөрүүлж, орон нутагт бие даан шийдвэр гаргах эрх мэдлийг олгож байгаагаараа онцлог юм.
Мал аж ахуйн салбарыг дэмжих хүрээнд малчдад тэжээлийн ургамал тариалах зориулалтаар 5 га хүртэлх газрыг давуу эрхээр, харин өвөлжөө, хаваржааны зориулалтаар 1 га хүртэлх газрыг үнэ төлбөргүй эзэмшүүлэхээр төсөлд тусгажээ. Мөн нийслэлээс орон нутагт шилжин ирсэн иргэд, гамшигт өртсөн өрхүүд болон хөгжлийн бэрхшээлтэй иргэдийн газар эзэмших хүсэлтийг эрэмбэ дараалал харгалзахгүйгээр шуурхай шийдвэрлэх журам орсон байна. Газар олгох байршил, хэмжээг Засгийн газраас төвлөрсөн байдлаар тогтоодог байсныг өөрчилж, орон нутгийн төлөвлөлтөд тулгуурласан тогтолцоонд шилжүүлснээр шат дамжлага цөөрч, иргэдэд учирдаг чирэгдэл багасах боломжтой.
Түүнчлэн зам, төмөр зам, ашигт малтмал зэрэг салбар хоорондын орон зайн мэдээллийг нэгдсэн цахим системд бүртгэснээр газрын давхцал, маргаанаас урьдчилан сэргийлэх нөхцөл бүрдэх юм. Энэхүү хуулийн шинэчлэл батлагдсанаар малчид тэжээлээ өөрсдөө тариалах замаар зуд, турхан болон уур амьсгалын өөрчлөлтөд дасан зохицох чадавх нь нэмэгдэнэ гэж үзэж байна. Орон нутаг өөрийн нөөц бололцоондоо тулгуурлан хөрөнгө оруулалт татах, ажлын байр бий болгох эрх зүйн орчин ийнхүү өргөжиж байна.
Сайн санаачилга байна
Зорилтот бүлгийн хүмүүст газар олгох нь зөв шийдвэр гэж бодож байна