Лондон хотын төвд болсон Палестиныг дэмжих эсэргүүцлийн ажиллагааны үеэр Шведийн байгаль орчны хөдөлгөөний идэвхтэн Грета Тунбергийг баривчилсан тухай мэдээллээ. Тус ажиллагаа нь баривчлагдан саатуулагдсан Palestine Action байгууллагын идэвхтнүүдийг дэмжих зорилготой байжээ.
“Палестины төлөө хоригдогсод” нэртэй эсэргүүцлийн бүлэг тухайн өдөр болсон үйл явдлын дүрс бичлэгийг нийтэлсэн байна. Тус бичлэгт Тунберг гартаа “Palestine Action-ы хоригдогсдыг би дэмжиж байна, би геноцидийг эсэргүүцэж байна” гэсэн бичигтэй зурагт хуудас барьсан нь харагджээ. Эсэргүүцлийн зохион байгуулагчдын тайлбараар уг ажиллагаа нь өлсгөлөн зарласан Палестины идэвхтнүүдийн үйлдэлд олон нийтийн анхаарлыг хандуулахад чиглэсэн байна.
Эсэргүүцлийн ажиллагааны зорилго, баривчилгааны мэдээлэл
Хүний эрхийг хамгаалах чиглэлийн Defend Our Juries байгууллага Г.Тунбергийг баривчилсан тухай мэдээллийг цацжээ. Харин Лондоны цагдаа баривчилсан хүмүүсийг албан ёсоор буруутгахаас өмнө нэрсийг нь нийтэд зарладаггүй гэж мэдээлэлд дурдсан байна.
Мөн “Палестины төлөө хоригдогсод” бүлгийн мэдэгдлээр тухайн өдрийн эсэргүүцлийн ажиллагааны бай нь Израилтай холбоотой батлан хамгаалах салбарын Elbit Systems компанид үйлчилгээ үзүүлдэг Лондоны нэгэн компани байсан аж.
Улаан будаг цацсан хэрэг ба цагдаагийн тайлбар
Лондоны цагдаагийн газрын мэдээллээр, өглөө Фенчерч-стрит дүүргийн нэгэн байшин руу улаан будаг цацсан тохиолдол бүртгэгджээ. Үүнтэй холбоотойгоор нэг эрэгтэй, нэг эмэгтэйг “бусдын өмчид санаатайгаар гэмтээсэн” гэх үндэслэлээр баривчилсан байна.
Ташрамд дурдахад, өмнөх мэдээллүүдэд Г.Тунберг болон “Сумуд” флотын 70 гаруй идэвхтэнийг Израилаас албадан гаргасан тухай мөн дурдсан байна.
