Бүгд Найрамдах Тажикистан Улсын Ерөнхийлөгч Эмомали Рахмон Бүгд Найрамдах Киргиз Улсад хийж буй төрийн айлчлалын хүрээнд 2025 оны 3-р сарын 13-нд Бишкек хотноо “Улс хоорондын хилийн тухай гэрээнд” гарын үсэг зурлаа. Энэхүү гэрээ нь хоёр улсын найрамдал, хамтын ажиллагааг бэхжүүлэхэд чухал ач холбогдолтой үйл явдал боллоо.
Киргиз-Тажикистаны хилийн боомтууд дахин нээгдэв
Хоёр улсын ерөнхийлөгч нар 2021 онд хилийн зэвсэгт мөргөлдөөний улмаас хаагдаад байсан Кызыл-Бел, Кайрагач шалган нэвтрүүлэх боомтуудыг дахин нээх онлайн ёслолд оролцлоо.
Ерөнхийлөгч Садыр Жапаров:
“Бид хөрш хоёр улс хоорондын хилийн гэрээг байгуулсан нь түүхэн ач холбогдолтой. Киргиз-Тажикистаны хил бол цаашид ахан дүүсийн мөнхийн найрамдлын хил байх болно” гэж онцоллоо.
Хамтын ажиллагааны шинэ алхмууд
- 3-р сарын 14-нөөс эхлэн Бишкек-Душанбе, Бишкек-Хужанд чиглэлд нислэг үйлдэж эхлэх
- Хоёр улсын хилийн бүс хооронд нийтийн тээврийн автобусны үйлчилгээг сэргээх
- “Найрамдал, сайн хөршийн харилцааг бэхжүүлэх тухай” зэрэг 16 баримт бичигт гарын үсэг зурах
- Хоёр улсын худалдааг 500 сая ам.долларт хүргэхээр тохиролцох
- “CASA-1000” Төв Ази-Өмнөд Азийн цахилгаан дамжуулах, худалдаалах төслийг эрчимжүүлэхээр шийдвэрлэх
Төв Азийн нэгдсэн виз гаргах саналыг Киргизийн Ерөнхийлөгч дэвшүүлэв
Садыр Жапаров Төв Азийн улс орнуудын иргэд хоорондоо визгүй зорчих, бусад улс орнуудад Шенгений визийн зарчмаар нэг визээр зорчих боломжтой болох шинэчлэл хийхийг санал болголоо.
📌 Садыр Жапаров:
“Төв Азийн улс орнуудын иргэд харилцан визгүй зорчиж, бусад гуравдагч орны иргэдэд зориулсан нэгдсэн нэг визтэй болох ажлыг эхлүүлэх хэрэгтэй” хэмээн мэдэгдэв.
Энэхүү саналыг хэрэгжүүлснээр Төв Азийн бүс нутгийн аялал жуулчлал, эдийн засгийн харилцаа өргөжин хөгжих боломжтой юм.
