Монгол Улсын Ерөнхий сайд Г.Занданшатар өнгөрсөн баасан гарагт /2025.09.12/ Монголын Ахмадын холбооны удирдлагууд, тэр дундаа холбооны Ерөнхийлөгч Ц.Сүхбаатарыг хүлээн авч уулзлаа.
Ахмадын холбооноос тэтгэврийг нэмэгдүүлэх, зээлийн хүүг бууруулах, хугацааг сунгах, орон сууцны хөнгөлөлтөд хамруулах зэрэг асуудлыг уламжилжээ. Тэдний хэлснээр:
- Тэтгэврийг инфляцын түвшинтэй уялдуулан 6 хувиар нэмэгдүүлэх хуультай.
- Гэвч өндөр тэтгэвэр авдаг ахмадуудын орлого 200–300 мянган төгрөгөөр өсөхөд, бага тэтгэвэртэй ахмадуудынх 40–60 мянгаар нэмэгдэх зөрүү гарч байна.
- Иймээс бага тэтгэвэртэй ахмадуудад илүү дэмжлэг үзүүлэх шаардлагатай.
- “Ахмадын орон сууц” хөтөлбөрийг үргэлжлүүлэх, хүүхдийн тооноос хамаарч тэтгэврийн хэмжээг тогтоох зэрэг асуудлыг эргэн харах ёстой.
Ерөнхий сайд Г.Занданшатар уулзалтын үеэр: “Ирэх онд тэтгэврийг 6 хувиар нэмэгдүүлэхэд 333.5 тэрбум төгрөгийн санхүүжилт шаардагдаж байна. Ингэснээр дундаж тэтгэврийн хэмжээ 901,000 төгрөгт хүрнэ. Ахмад настнуудын амьдралын чанарыг сайжруулах асуудал Засгийн газрын анхаарлын төвд байна. Тиймээс холбогдох яамд болон Ахмадын холбоо хамтран дунд хугацааны хөгжлийн хөтөлбөр боловсруулах хэрэгтэй” хэмээлээ.
Мөн тэрбээр төсвийн орлого 3.3 их наядаар тасарч, эдийн засгийн нөхцөл хүнд байгаа ч зайлшгүй зардал болох тэтгэвэр, тэтгэмж, хүүхдийн мөнгийг хэвийн олгохоор ажиллаж буйг онцлов.
Үндэсний статистикийн хорооны мэдээлснээр, 2024 онд хүн амын 11.5 хувь нь ахмад настан байсан бол 2050 он гэхэд энэ үзүүлэлт 19.8 хувь болж, таван хүн тутмын нэг нь ахмад болох төлөвтэй байна.
Засгийн газар ойрын таван жилд цалин, тэтгэвэр, тэтгэмжийг олон улсын жишигт нийцүүлэн нэмэгдүүлэх зорилт тавьсан. Ирэх сард 2026–2030 оны хөгжлийн үндсэн чиглэлийг УИХ-д өргөн мэдүүлэхдээ ахмад настны талаар цогц бодлого тусган оруулна гэдгийг Ерөнхий сайд мэдэгдэв.
Уулзалтын төгсгөлд Г.Занданшатар Гэр бүл, хөдөлмөр, нийгмийн хамгааллын яам болон бусад байгууллагуудыг оролцуулсан Ажлын хэсэг байгуулж, ахмад настнуудын тулгамдсан асуудлыг шийдвэрлэх чиглэл өглөө.
