Монгол Улсын иргэд жил бүр хэчнээн өдөр амрах тухай хуулийн зохицуулалт байдаг ч, нийтээр тэмдэглэх баярын болон тэмдэглэлт өдрүүд заримдаа Бямба, Ням гаригтай давхцах тохиолдол гардаг. Ирэх онд ийм байдал дөрвөн өдөр үүсэхээр байна.
“Нийтээр тэмдэглэх баярын болон тэмдэглэлт өдрүүдийн тухай хууль”-ийн дагуу Монголчууд дараах өдрүүдэд жил бүр бүх нийтээр амардаг:
- Нэгдүгээр сарын 1: Шинэ жилийн баяр.
- Цагаан сар: Билгийн тооллын шинийн нэгнээс гуравны хооронд (3 өдөр).
- Гуравдугаар сарын 8: Олон улсын эмэгтэйчүүдийн эрхийг хамгаалах өдөр.
- Зургаадугаар сарын 1: Хүүхдийн эрхийг хамгаалах өдөр.
- Долоодугаар сарын 10-15: Үндэсний их баяр наадам (6 өдөр).
- Их Эзэн Чингис хаан мэндэлсэн өдөр: Билгийн тооллын өвлийн тэргүүн сарын шинийн нэгэн.
- Арванхоёрдугаар сарын 29: Үндэсний эрх чөлөө, тусгаар тогтнолоо сэргээсний баярын өдөр.
- Арваннэгдүгээр сарын 26: Бүгд Найрамдах Улс тунхагласан өдөр.
- Бурхан багшийн Их дүйчин өдөр: Билгийн тооллын зуны тэргүүн сарын шинийн 15.
Ажлын Өдөрт Шилжүүлэх Асуудал
Бүх нийтийн амралтын өдрүүдийн зарим нь долоо хоногийн амралтын өдрүүдтэй (Бямба, Ням) таарч байгаа нь амралтын тоог бодитоор бууруулдаг. Тиймээс эдгээр амралтын өдрүүдийг ажлын өдөрт шилжүүлэх тухай хуулийн төслийг одоогоор УИХ-д хэлэлцэж байна.
Уг хуулийн төслийг санаачилсан УИХ-ын гишүүн Б.Уянга дараах тайлбарыг өгсөн юм: “Нийтээр амрах тухай хуулиар есөн баярын 16 хоногт нь бүх нийтээр амрахаар зохицуулсан байдаг. Одоогийн хэлэлцэж байгаа хуулийн төсөл нь үндэсний хэмжээний баяр, наадмаар долоо хоногийн амралтын өдөр таарсан тохиолдолд дараагийнбуюу ажлын өдрүүд рүү шилждэг байх зохицуулалтыг хуульчлан оруулж байгаа. Энэ заалт өмнө нь байсан ч 2022 оны шинэчилсэн найруулгаар хасагдсан”.
Түүний хэлснээр, энэ нь өмнө нь хуульд байсан ч хасагдсан зохицуулалтыг буцаан оруулж ирэх оролдлого юм. Ирэх онд нийт дөрвөн амралтын өдөр Бямба эсвэл Ням гаригт тохиож байгаа нь уг хуулийн төслийн хэлэлцүүлгийг илүү чухал болгож байна.
