Их эзэн Чингис хаан мэндэлсний 863 жилийн ой, “Монгол бахархлын өдөр”-ийг тохиолдуулан зохион байгуулагдах уламжлалт “Чингис хаан цом” үндэсний бөхийн барилдаан энэ баасан гараг, арваннэгдүгээр сарын 21-нд болно. Тэмцээн Монгол бөхийн өргөөнд болох бөгөөд улс, аймгийн алдар цолтой 128 бөх зодоглох эрхийн төлөө бүртгүүлж байна.
Барилдаанд зодоглох бөхчүүдийн бүртгэлийг өнөөдрөөс эхлэн хоёр өдөр үргэлжлүүлэн https://www.devjee.mn/ цахим хуудсаар авч байгаа юм. Ийм байдлаар бөхчүүдийг онлайнаар урьдчилан бүртгэх нь тэмцээний зохион байгуулалт, сугалаа, хуваарийг илүү ил тод, дэг журамтай явуулах нөхцөл бүрдүүлж байна.
Монгол Улсын Ерөнхийлөгчийн 2024 оны арваннэгдүгээр сарын 2-ны өдөр гаргасан 165 дугаар зарлигаар “Чингис хаан” цомыг “Монгол бахархлын өдөр”-ийн барилдаанд түрүүлсэн бөхөд гардуулж байх шийдвэр гарсан. Энэ шийдвэрийн дагуу тус цом нь Монгол бөхийн хамгийн нэр хүндтэй шагналуудын нэг болж, жил бүрийн түрүү бөхөд очдог уламжлал бүрэлдэж эхэллээ.
Өнгөрсөн жил болсон анхны “Чингис хаан цом”-ын эзнээр Улсын харцага Э.Даш тодорч, алтан соёмбот цомыг өргөн авч байсан билээ. Тэрээр түрүү бөхөөр тарихнаа бичигдэж, цомын түүхийг эхлүүлсэн анхны аварга болсон нь олон бөх сонирхогчдын сэтгэлд тод үлдсэн.
“Монгол бахархлын өдөр”-ийн барилдаанд түрүүлж, үзүүрлэж байсан бөхчүүдийг он оны дарааллаар доор товчлон сануулъя.
- 2024 он – Түрүү: Улсын харцага Э.Даш, үзүүр: Улсын заан С.Сүхбат
- 2023 он – Түрүү: Улсын арслан Ц.Бямба-Отгон, үзүүр: Улсын заан Б.Бат-Өлзий
- 2021 он – Түрүү: Улсын гарьд Ө.Бат-Орших, үзүүр: Улсын аварга О.Хангай
- 2019 он – Түрүү: Улсын начин Н.Баярбаатар, үзүүр: Улсын арслан Б.Орхонбаяр
- 2018 он – Түрүү: Улсын заан Д.Анар, үзүүр: Улсын заан Б.Бат-Өлзий
- 2017 он – Түрүү: Улсын гарьд Н.Ганбаатар, үзүүр: Улсын харцага Э.Даш
- 2016 он – Түрүү: Улсын арслан Р.Пүрэвдагва, үзүүр: Улсын харцага Э.Даш
- 2015 он – Түрүү: Улсын аварга П.Бүрэнтөгс, үзүүр: Улсын начин Л.Цэрэнтогтох
- 2014 он – Түрүү: Улсын гарьд Ө.Бат-Орших, үзүүр: Улсын аварга С.Мөнхбат
- 2013 он – Түрүү: Улсын аварга Ч.Санжаадамба, үзүүр: Улсын аварга С.Мөнхбат
- 2012 он – Түрүү: Улсын аварга Ч.Санжаадамба, үзүүр: Улсын арслан Ц.Содномдорж
Ийнхүү “Монгол бахархлын өдөр”-ийн барилдаан, “Чингис хаан цом” нь үе үеийн аваргуудыг тодруулж, монгол бөхийн түүхэн алдрыг бататгаж иржээ. Энэ жилийн барилдаанд аль бөх цомын ээлжит эзнээр тодрохыг бөх сонирхогчид тэсэн ядан хүлээж байна.
