Дэлхий даяар IELTS шалгалтыг зохион байгуулагчид 2026 оноос эхлэн шалгалтын хэлбэрт томоохон шинэчлэл хийж, олон улс оронд цаасан шалгалтыг халан, зөвхөн компьютероор авах шийдвэр гаргаж байна. Энэхүү өөрчлөлт нь Ойрх Дорнод, Өмнөд Ази болон Азийн орнуудад эрчимтэй ажиглагдаж байгаа юм.
Олон улсын чиг хандлага
Ази, Ойрх Дорнод, Африкийн арав гаруй улс IELTS-ийг цаасаар авахаа бүрэн зогсоогоод байна.
- Бүрэн шилжсэн улсууд: Вьетнам, Малайз, Пакистан, Нигер зэрэг улсууд өмнө нь шалгалтыг дан компьютероор авах системийг хэрэгжүүлсэн.
- Шинээр нэгдэж буй улсууд: Бахрейн, Йордан улс 2026 оны хоёрдугаар сараас, Бангладеш улс аюулгүй байдлын улмаас цаасан шалгалтаас татгалзаж байна.
- Түр зогсолт хийсэн улсууд: Тайвань, Узбекистан зэрэг улсууд цаасан шалгалтыг нэг мөр халаагүй бөгөөд тодорхой хугацааны дараа эргэн сэргээх боломжтойг илэрхийлжээ.
- Хязгаарлалт тогтоосон улсууд: Япон, Өмнөд Солонгос, Сингапур зэрэг орнууд зөвхөн өөрийн улсын оршин суугчдад цаасаар өгөх боломжийг олгож, гадаадын иргэдэд энэ сонголтыг хязгаарласан байна. Энэ нь шалгалтын үеэр хуурах үйлдлийг бууруулах зорилготой аж.
- Барууны орнууд: АНУ, Австрали, Канад болон Европын орнуудад цаасан шалгалт авах давтамж эрс цөөрч, зөвхөн ахмад настан эсвэл тусгай хэрэгцээт иргэдэд зориулсан туслах сонголт болгон үлдээж байна.
Монгол Улс дахь өөрчлөлт
Монгол улсад IELTS-ийн цаасан шалгалтыг зохион байгуулдаг байсан “ESP Foundation” байгууллага 2026 оны 03 дугаар сарын 21-ний өдрөөс эхлэн цаасан хэлбэрийн шалгалт авахаа албан ёсоор зогсоож байгаагаа мэдэгдлээ. Үүнээс хойш бүх шалгалтыг илүү үр дүнтэй, хялбар компьютер суурьтай хэлбэрээр авахаар болсон байна.
Компьютер суурьтай шалгалтын давуу талууд
Шалгалтын бүтэц, агуулга, оноо өгөх журам нь цаасан хэлбэртэй ижил боловч компьютероор өгөхөд дараах бодит давуу талууд бий болж байна:
- Шуурхай хариу: Шалгалтын дүнг ердөө 1-2 хоногийн дотор мэдэх боломжтой.
- Бүртгэлийн уян хатан байдал: Шалгалт болохоос нэг хоногийн өмнө бүртгүүлэх боломжтойгоос гадна товлогдсон өдрийн сонголт олон болсон.
- Нэг чадварыг дахин өгөх (One Skill Retake): Хэрэв та зөвхөн нэг хэсэг дээрээ (жишээ нь Writing) оноогоо ахиулахыг хүсвэл бүх шалгалтыг дахин өгөлгүйгээр тухайн чадвараа дангаар нь өгөх боломжтой.
- Аюулгүй байдал: Хуулах асуудал багасаж, шалгалтын ачаалал буурна.
Дэлхийн хэмжээнд жилд дунджаар 2 сая гаруй хүн IELTS өгдөг бөгөөд энэхүү цахим шилжилт нь шалгуулагчдад илүү таатай, дэвшилтэт орчныг бүрдүүлж байна.
