Тайванийн асуудлаар Ерөнхий сайд Санаэ Такаитигийн гаргасан мэдэгдэл болон үүнд Бээжингээс үзүүлсэн хатуу хариу үйлдэл зэргээс үүдэлтэйгээр БНХАУ-тай харилцаа муудсанаар Япон улс өөрийн амьтны хүрээлэнгүүддээ Хятадын пандаг түрээслэх боломжгүй болох эрсдэлтэй тулгарч байна.
Mongolnews24.com мэдээллийн эх сурвалж болох Kyodo агентлагт дурдсанаар, одоогоор Японд Хятадаас түрээсэлсэн хоёр панда болох Сяо-Сяо болон Лэй-Лэй байгаа аж. Энэхүү хоёр амьтан нь Токиогийн Уэно амьтны хүрээлэнгийн гол үзвэр юм.
Kyodo агентлаг дээрх хоёр пандагийн түрээсийн хугацаа 2026 оны хоёрдугаар сард дуусах бөгөөд Хятад улс Японд шинэ панда түрээслэхээс татгалзаж болзошгүй хэмээн болгоомжилж байгаагаа илэрхийлжээ. Тайванийн талаарх Ерөнхий сайдын мэдэгдлийг хүчтэй шүүмжилж буй Хятадын хэвлэл мэдээлэл, нийгмийн сүлжээний хэрэглэгчид ийм санааг хэдийнээ илэрхийлээд эхэлсэн байна.
Япон, Хятадын харилцаа хурцдах шалтгаан нь Японы Ерөнхий сайд Санаэ Такаити парламентын хэлэлцүүлгийн үеэр Тайванийн ойролцоо үүсэх магадлалтай цэргийн хямрал нь “оршин тогтноход заналхийлэх аюул” болох бөгөөд энэ нь Японыг “хамтын өөрийгөө хамгаалах эрхээ” ашиглахад хүргэж болзошгүй гэж мэдэгдсэнтэй холбоотой юм.
Энэ нь Бээжингийн зүгээс хүчтэй эсэргүүцэлтэй тулгарч, Токиод албан ёсны ноцтой эсэргүүцэл илэрхийлжээ. БНХАУ-аас Осака дахь Ерөнхий консул Сюэ Зянь нийгмийн сүлжээний Х хуудсандаа Японы Ерөнхий сайдын “толгойг тасдах”-аар сүрдүүлсэн боловч хожим энэ бичвэрийг устгасан байна. Улмаар Хятадын Гадаад хэргийн яам иргэдээ Японд зорчихгүй байхыг анхааруулсан юм.
