АНУ-ын ерөнхийлөгч Дональд Трамп Бээжинд айлчлахын өмнөхөн Хятад улс цөмийн дэд бүтцээ нууцаар өргөтгөж байгаа тухай CNN агентлаг мэдээллээ.
Тус агентлагийн мэдээлснээр, Хятадын эрх баригчид Сычуань мужийн нэгэн тосгоны иргэдийг хүчээр нүүлгэн шилжүүлж, цөмийн зэвсэг боловсруулах томоохон үйлдвэр барьж эхэлсэн байна. Уг төслийн хамгийн анхаарал татаж буй байгууламж нь Тунцзян голын эрэг дээр орших ер бусын хэлбэртэй, асар том бөмбөгөр оройт барилга ажээ.
“Одоогоор уг байгууламжид тоног төхөөрөмж суурилуулсаар байгаа бөгөөд ашиглалтад хараахан ороогүй байх магадлалтай” гэж нийтлэлд дурджээ.
Шинэ байгууламжийн техникийн үзүүлэлтүүд:
- Талбай: 3,300 метр квадрат.
- Хийц: Цацраг идэвхт бодис мэдрэгч болон дэлбэрэлтээс хамгаалагдсан хаалга бүхий бетон болон ган бүтэц.
- Зориулалт: Шинжээчдийн таамаглаж буйгаар энэхүү байгууламж нь цацраг идэвхт өндөр түвшний материал болох уран болон плутонийг хадгалах зориулалттай юм.
АНУ-ын ерөнхийлөгч Бээжинд айлчлахдаа Хятадын талд цөмийн зэвсэглэлээ нэмэгдүүлж буй асуудлаар шахалт үзүүлэхээр төлөвлөж байгаа ч БНХАУ Трампын тавьсан болзолд найр тавих бодолгүй байгааг CNN онцолжээ. Энэхүү нууц бүтээн байгуулалт нь хоёр улсын хэлэлцээрийн өмнөх хүчний тэнцвэрт томоохон нөлөө үзүүлэх магадлалтай байна.
