Шанхай хотод 36 настай бүх мөчөө алдсан эрэгтэйд хиймэл оюунд суурилсан тархи-компьютер интерфейс суулгах мэс заслыг амжилттай хийжээ. Энэхүү технологиор тэрбээр компьютерийг зөвхөн бодлоороо удирдаж, шатар тоглох, видео тоглоом тоглох боломжтой болсон байна.
БНХАУ клиникийн туршилтад инвазив нейроинтерфейс нэвтрүүлсэн хоёр дахь улс боллоо
Global Times-ын мэдээлснээр, уг технологийг Хятадын ШУА болон Хуашань их сургуулийн эмнэлгийн мэдрэлийн мэс заслын баг 5 жилийн турш хөгжүүлжээ. Уг туршилт нь АНУ-ын дараа инвазив төрлийн BCI (brain-computer interface)-ийг бодитоор эмчилгээний практикт ашигласан анхны тохиолдол боллоо.
Имплантын онцлог: Дэлхийн хамгийн жижиг бөгөөд уян хатан электрод
2025 оны 3-р сард эмчлүүлэгчийн тархины хөдөлгөөний хэсэгт суулгасан энэхүү төхөөрөмж нь зоосны дайтай хэмжээтэй — диаметр нь 26 мм, зузаан нь 6 мм-ээс бага. Түүний электрод нь хүний үснээс ч нарийн учраас тархины эд эсийг гэмтээх эрсдэл маш бага бөгөөд нейро-сигналын нарийвчлалтай уншилтыг хангаж чаддаг. “Манай багийн боловсруулсан электрод нь Neuralink-ийнхээс 5–7 дахин нарийхан бөгөөд уян хатан байдал, аюулгүй байдлаараа дэлхийд тэргүүлж байна” гэж судалгааг удирдсан Чжао Чжэнтуо тайлбарласан байна.
Хариу үйлдэл өндөр хурдтай, аюулгүй ажиллагаа баталгаажжээ
Имплантыг суулгаснаас хойш хэдэн сарын хугацаанд ямар нэгэн халдвар, эсвэл эд эсийн эсэргүүцэл илрээгүй байна. Мэдрэлийн сигнал уншиж, командыг компьютер руу дамжуулах процесс дунджаар хэдхэн арван миллисекунд л зарцуулдаг нь өндөр хурдтай ажиллагааг баталгаажуулж байгаа аж.
Дараагийн алхам — робот гарыг бодлоор хянах сургалт
Судлаачид одоогоор өвчтөнд роботжуулсан хиймэл гарын хөдөлгөөнийг удирдах анхны сургалтыг эхлүүлэхэд бэлдэж байгаа бөгөөд эхний алхам нь аяга өргөх, товчлуур дарах зэрэг энгийн үйлдэл байна. Цаашдаа илүү төвөгтэй хөдөлгөөнийг удирдах чадварт хүргэх зорилготой.
2028 он гэхэд хэрэглээнд нэвтрүүлнэ
Хөгжүүлэгчдийн зорилго бол энэхүү BCI системийг 2028 он гэхэд зах зээлд нэвтрүүлж, тархины гэмтэлтэй, бүх биеийн саажилттай, мэдрэлийн өвчтэй хүмүүст амьдралын чанарыг эрс сайжруулах боломж олгох явдал юм.
