Нийслэлчүүдийн хүсэн хүлээдэг “Хүрээ цам–Даншиг наадам 2025” шашин, соёлын наадмыг энэ зургаадугаар сарын 28–29-нд Хүй долоон худагт анх удаа нийслэлийн иргэдийн баяр болгон өргөн хүрээнд тэмдэглэнэ.
Наадмын гол зорилго нь Монголын соёл, шашны уламжлалыг түгээн дэлгэрүүлэх, аялал жуулчлалыг дэмжих, олон улсын жуулчдыг татах явдал юм.
Онцлох хэсгүүд:
- Цам харайх ёслол – Бурханы шашны “бага таван ухааны” нэг болох бүжиглэлийн ухааныг харуулсан угсраа үзүүлбэрт 120 гаруй цамчин оролцож, Очирваань бурхан, Цагаан өвгөн, Хангарьд, Хөх өвгөн зэрэг дүрд хувилан, хортон дайсан, ад зэтгэрийг бэлгэдлийн утгаар дарах гайхамшигт хөдөлгөөнийг илэрхийлнэ.
- Соёлын олон талт арга хэмжээ:
- Хүчит бөхийн барилдаан
- Хурдан болон жороо морины уралдаан
- Шагай, сур харваа
- Сээр цохих тэмцээн
- Жижиг, дунд бизнес эрхлэгчдийн үзэсгэлэн
- “Монгол туургатан” уран бүтээл (Улаанбаатар театр)
- Ардын авьяастнуудын тоглолт
- Монгол хувцасны үзүүлбэр, гэрэл зургийн үзэсгэлэн
- Шашны зан үйл, уламжлалт арга хэмжээ:
- Даншигийн цуваа
- Сүнчэ айлдвар
- Очирвааний тахилга
- Чингис хааны сан
- Балин тосон урлал
- Ном хаялцах, мэтгэлцээн
- Соёмбот туг залах
- Шашны сүлд дуулал эгшиглүүлэх
Эхлэл ёслол:
Наадмын ажиллагаа зургаадугаар сарын 27-нд Улаанбаатар хотын тахилга шүтлэгт дөрвөн хайрхан (Богдхан, Сонгинохайрхан, Чингэлтэй, Баянзүрх) тахих ёслолоор эхэлнэ. Үүний хүрээнд нийслэлийн сүм хийдүүд хурал ном хурж, цан хэнгэргээ дэлдэж, иргэдийн сайн сайхны төлөө буян номын ажиллагаа явуулна.
Түүхэн үндэс:
“Даншиг наадам” нь анх 1639 онд Өндөр гэгээн Занабазарыг Богдын ширээнд залах үеэс эхлэлтэй бөгөөд Монголын шашин, соёлын уламжлалт томоохон арга хэмжээ болон өнөөг хүрчээ.
