Хөвсгөл аймгийн Цагааннуур, Рэнчинлхүмбэ, Улаан-Уул сумдын ерөнхий боловсролын сургуулиуд дулаан алдагдал ихтэй, халаалтгүй нөхцөлд хичээллэж байгаа тухай мэдээлэл олон нийтийн анхаарлыг татаад байсан юм. Хүйтний улиралд сурагчид дээлтэйгээ сууж, заримдаа хичээл хаагдахад хүрдэг байсан энэ асуудлыг шийдвэрлэхээр Боловсролын сайд П.Наранбаяр тэргүүтэй албаны хүмүүс болон Азийн хөгжлийн банкны (АХБ) төлөөллүүд газар дээр нь ажиллалаа.
Албаны хүмүүс сургуулиудын төсөв, санхүүгийн гацааг гаргаж, “зуухан галлагаа”-тай хуучин барилгуудыг орчин үеийн стандартад нийцсэн сургуулиар солих шийдвэрүүдийг дараах байдлаар гаргасан байна:
- Цагааннуур сум: АХБ-ны хөрөнгө оруулалтаар 320 хүүхдийн багтаамжтай цоо шинэ сургуулийн барилгын ажлыг 2026 онд эхлүүлж, 2027 онд ашиглалтад оруулахаар тогтов.
- Рэнчинлхүмбэ сум: Зургаан жилийн турш 75 хувийн гүйцэтгэлтэй зогсоод байсан 320 суудалтай сургуулийн барилгыг яаралтай дуусгаж, энэ ондоо багтаан үүд хаалгыг нь нээхээр боллоо.
- Хөөндий баг: Алслагдсан багийн хүүхдүүдэд зориулж НҮБ-ын Хүүхдийн сангийн дэмжлэгтэйгээр “Багийн бага сургууль”-ийг байгуулахаар шийдвэрлэв.
Шинэ сургуулиуд ашиглалтад орсноор сурагчид тохь тухтай орчинд эрдэм ном сурах боломж бүрдэж, хөдөөгийн хүүхдүүдийн сургууль завсардалт багасах ач холбогдолтой юм. Ялангуяа “Багийн бага сургууль” байгуулагдсанаар бага насны хүүхдүүд гэр бүлээсээ холдохгүйгээр, аюулгүй орчинд боловсрол эзэмших нөхцөл бүрэн хангагдах ажээ.
