Хөвсгөл аймгийн Тариалан сумын “Сайхан мод” орчмоос алга болсон хоёр настай хүүг олох эрлийн ажиллагаа өнөөдөр долоо дахь өдрөө үргэлжилж байна.
Өчигдөр /2025.09.22/ эрлийн багийнхан алга болсон газраас баруун хойд зүгт 4–5 км радиуст самналт хийжээ. Үдээс хойш албаныхны удирдлага дор зургаан хүн морьтойгоор хайсан байна. Мөн ногоон нүдэн дуран, дулаан мэдрэгч төхөөрөмж бүхий дрон ашиглан “Давааны нарийны бэл” гэх газраар хад асга, ан амьтны үүр байж болох нүх зэрэг хэсгүүдийг шалгажээ. Цагдаагийн алба хаагчид ч явганаар мөрдөн шалгах ажиллагаа явуулж, нийтдээ 13 км орчим газар самнасан боловч үр дүнд хүрээгүй тул эрлийг 22:00 цагт түр зогсоосон байна.
Эрлийн ажиллагаанд Хөвсгөл, Орхон, Булган, Дархан-Уул аймгийн ОБГ, Агаараас эрэн хайх 111 дүгээр анги, Үндэсний аврах бригад, цагдаагийн байгууллагууд, Зэвсэгт хүчний болон хилийн цэргийн анги нэгтгэлүүд, орон нутгийн удирдлага, сургуулийн багш, ажилчид, ар гэрийнхэн, сайн дурын иргэд оролцож байна. Хээрийн штабт алба хаагчид хуваарийн дагуу үүрэг гүйцэтгэж байгаа бөгөөд Хүүхэд гэр бүл, хөгжлийн газрын ажилтнууд ар гэрийнхэнд сэтгэлзүйн дэмжлэг үзүүлжээ.
Цагдаагийн байгууллагын тайлбар
Хүүг эрэх ажиллагааны явцад цагдаагийн байгууллага олон нийтэд зураг тараасан ч энэ нь алга болсон хүүхдийн биш, өмнө эрэн сурвалжлагдаж байсан өөр хүүхдийн зураг байсан гэж шүүмжлэл гарсан. Харин цагдаагийн байгууллага энэ талаар тайлбар өгөхдөө:
“Хүүг сураггүй болох үед аав ээж нь энэ зургийг өгсөн” хэмээн мэдэгдэв.
Хүүгийн талаар тодорхой ул мөр олдоогүй хэвээр байгаа тул эрлийн ажиллагаа үргэлжилж, иргэдээс холбоотой мэдээллийг төлбөртэйгөөр авах тухай шийдвэр хүчин төгөлдөр үйлчилсээр байна.
