УИХ-ын гишүүн асан Ц.Цэрэнпунцаг, “Эрэл”-ийн Б.Эрдэнэбат, “Таванбогд”-ын Ц.Баатарсайхан нарын хүүхдүүд бүлэглэн, мансуурсан үедээ 25 настай залууд хүнд гэмтэл учруулсан ноцтой хэрэг гараад дөрвөн сар өнгөрчээ. Тодруулбал, энэхүү зодоон өнгөрсөн долдугаар сард Сүхбаатар дүүргийн нутаг дэвсгэрт байрлах нэгэн цэнгээний газрын гадаа болсон юм. Уг хэргийн улмаас хохирогч залуугийн биеийн байдал маш хүнд, нүд, тархи нь ноцтой гэмтсэн байсан тул гадаад улсад эмчилгээ хийлгэсэн.
Хэрэгт Холбогдогчид:
- Хэрэгт голлон холбогдсон Ц.Цэрэнпунцагийн хүү Санжаачойпэл болон Б.Эрдэнэбатын хүү Тэмүүлэн нарыг цагдан хорьсон билээ. Санжаачойпэлийн шинжилгээнээс мансууруулах бодис илэрсэн нь тогтоогдож, шалгалтын ажиллагаа үргэлжилж байна.
- Харин зодоонд хамжигчаар оролцсон Ц.Баатарсайханы хүү Б.Амарсайхан (мөн “Говь” ХК-ийн гүйцэтгэх захирал) хэрэг гарах үедээ Монгол Улсын хилээр гарч зугтсан байсан. Хуулийн байгууллагынхан түүнийг эрэн сурвалжилж, өнгөрсөн сард эх оронд нь авчирсан юм.
Хохирогчийн Биеийн Байдал:
Хохирогч залуугийн аав Д.Дашзэвэгтэй хэд хоногийн өмнө холбогдож, хүүгийнх нь эрүүл мэндийн талаар тодруулсан. Тэрээр хүүгийнхээ биеийн байдал сайжирч байгааг дуулгасан: “Миний хүүгийн биеийн байдал дээрдэж байгаа. Хүү минь эдгэж байна. Гэхдээ бүрэн эдгэрэхэд цаг хугацаа шаардлагатай. Мэс засалд орж, амжилттай болсон. Мэс заслын эмч хэлэхдээ ‘Хүүгийн чинь нүдний харааг бүх боломжоороо дахин сэргээсэн. Одоо давгүй болж байна.’ гэсэн юм. Хэрэг нь прокурор руу шилжиж байгаа байх.”
