АНУ-ын засаг захиргаа Сангийн яам болон NASA зэрэг төрийн байгууллагуудад хиймэл оюун ухаан (ИОУ) болон бусад дэвшилтэт технологийг нэвтрүүлэхийн тулд 1,000 орчим програм хангамжийн инженерийг ажилд авахаа зарлалаа.
Mongolnews24.com-ийн мэдээлснээр, энэ тухай Цагаан ордны “Tech Force” хөтөлбөрийн хүрээн дэх хүний нөөцийн хэлтсийн дарга Скотт Купорын хэлснээс иш татан Financial Times (FT) сонин мэдээлсэн байна.
Илон Маск, Сэм Алтман зэрэг технологийн салбарын тэрбумтнууд Ерөнхийлөгч Дональд Трампын засаг захиргаанд холбооны агентлагуудын дижитал дэд бүтцийг хурдацтай шинэчлэх үүрэг хүлээх АНУ-ын төрийн албан хаагчдын элит боловсон хүчнийг бэлтгэхэд туслах юм. Засаг захиргаа Apple, Coinbase, Microsoft, Nvidia, OpenAI, xAI болон Palantir зэрэг технологийн аваргуудтай хамтын ажиллагаагаа албажуулжээ.
“Tech Force” хөтөлбөрт оролцох хүсэлтэй иргэдээс одоогийн байдлаар 10,000 гаруй өргөдөл ирээд байна. Ажилд авах шийдвэрийг дээд боловсрол эсвэл ажлын туршлага дээр биш, харин зөвхөн ур чадвар дээр үндэслэн гаргах аж. Шалгарсан нэр дэвшигчдийн жилийн цалин 150,000-аас 200,000 ам.доллар байх бөгөөд энэ нь холбооны засгийн газрын МТ-ийн салбарын анхан шатны мэргэжилтнүүдийн дундаж цалингаас хавьгүй өндөр байгааг FT мэдээлэв.
