Японы мэргэжлийн сүмогийн түүхэн дээд амжилт эзэмшигч, домогт ёкозүна Хакүхо М.Даваажаргал сүмогийн ертөнцөөс бүр мөсөн гарч, цаашдын замналаа өөрчлөх шийдвэр гаргасан талаар албан бус мэдээлэл Японы хэвлэлүүдээр цацагдаж эхэллээ. Тэрээр сүмогийн холбоонд холбогдох өргөдлөө 2025 оны тавдугаар сарын 29-ний өдөр өгсөн бөгөөд уг асуудлыг хэлэлцэх хурал ирэх зургадугаар сарын 2-нд товлогдсон байна.
Сүмог орхих шийдвэрийн шалтгаан
Хакүхо нь зодог тайлсныхаа дараа Миягино нэрээр дэвжээ удирдан, шавь нар бэлтгэх болсон. Гэвч түүний гол шавь, ирээдүйтэй гэгдэж байсан Хокүсэйхо А.Даваанинж дэвжээний бусад бөхчүүдээ дарамталж, дээрэлхдэг байсан нь ил болж, улмаар дэвжээ нь татан буугдаж, Исэгахама дэвжээнд нэгдсэн түүхтэй.
Үүнээс улбаалан:
- Хакүхо өөрийн дэвжээгээ алдаж, бие даан удирдах эрхгүй болсон
- Тэр Исэгахама дэвжээг өвлөн авахаар төлөвлөгдөж буй Тэрүнофүжи Г.Ган-Эрдэнэтэй дотно бус харилцаатай бөгөөд түүний доор ажиллах хүсэлгүй байгаа гэж хэвлэлүүд онцолжээ
Түүхэн дэвжээ өөр эзэнтэй болно
Исэгахама дэвжээг тун удахгүй, зургадугаар сарын 9-нд японы иргэн болсон Тэрүнофүжи Г.Ган-Эрдэнэ албан ёсоор өвлөн авах юм. Ингэснээр түүний шинэ үүрэг, япон сүмогийн дотоод бүтэц дэх байр суурь илүү баталгаажих болно.
Хакүхогийн дараагийн алхам
Хакүхо сүмог орхих шийдвэрээ ивээн тэтгэгчид, ойр дотны хүмүүстээ мэдэгдсэн бөгөөд сүмогийн холбоо түүний өргөдлийг хараахан баталгаажуулаагүй байгаа ч хуралдааны дараа албан ёсны хариу гарах юм.
Мөн тэрээр зургадугаар сарын 3-ны өдөр Улаанбаатар хотын Төв цэнгэлдэх хүрээлэнгийн гадаа өөрийн аав, Монгол Улсын дархан аварга Ж.Мөнхбатын хөшөөний нээлтэд оролцохоор ирнэ.
Хакүхо — Түүхэн амжилтын эзэн
- Мэргэжлийн сүмогийн дээд зиндаанд 45 удаа түрүүлсэн түүхэн амжилтын эзэн
- Шавь нараа бэлтгэх, өөрийн дэвжээ байгуулах зорилгынхоо төлөө Монгол Улсын иргэншлээс татгалзаж, Японыг сонгосон
Түүний сүмогийн дараах амьдрал хэрхэх нь одоо олны анхаарлыг татаж байгаа бөгөөд шинэ замнал, зорилго нь ойрын өдрүүдэд тодорхой болох юм.
